பணம் வைத்து சூதாடிய குற்றத்திற்காக கைது செய்யப்பட்டவர்களில் ஓய்வுபெற்ற அதிகாரிகளும், ஒரு சப் இன்ஸ்பெக்டரும் இருப்பது தெரியவந்துள்ளது.
காஞ்சிபுரம் மாவட்டத்தில் பெருங்களத்தூரில் உள்ள பார்வதி நகர் 1வது தெருவில் பணம் வைத்து சூதாடுவதாக போலீசாருக்கு தகவல் கிடைத்தது. இதனையடுத்து தாம்பரம் உதவி கமிஷனர் உக்கிர பாண்டியன் தலைமையில் போலீசார் அவ்விடத்திற்கு விரைந்து சென்றனர். அப்போது அவ்விடத்தில் சிலர் பணத்தை வைத்து விளையாடியதை போலீசார் கண்டுபிடித்தனர்.
இதனையடுத்து சூதாட்டத்தில் ஈடுபட்ட 15 பேரை போலீசார் கைது செய்த போது, கைதானவர்களில் ஓய்வுபெற்ற அதிகாரிகளும், போலீஸ் சப்-இன்ஸ்பெக்டரும் இருப்பது தெரியவந்துள்ளது. மேலும் போலீசார் அவர்களிடம் இருந்த 15 செல்போன்களையும், ரூபாய் 35 ஆயிரம் பணத்தையும் பறிமுதல் செய்தனர். இதனைத் தொடர்ந்து திருநாவுக்கரசு என்பவரை அந்த வீட்டில் சூதாட்ட கிளப் நடத்திய குற்றத்திற்காக போலீசார் வலைவீசி தேடி வருகின்றனர்.