ஏற்கனவே 2 பெண்களை திருமணம் செய்து குடும்பம் நடத்தி வருபவர் வகுப்பு மாணவியை கடத்திச் சென்ற சம்பவம் பரபரப்பை ஏற்படுத்தியுள்ளது.
திருநெல்வேலி மாவட்டத்தில் உள்ள புதூர் கிராமத்தில் ஸ்டீபன் என்ற கூலி தொழிலாளி வசித்து வருகிறார். இவர் தனது இரண்டு மனைவிகளுடன் ஒரே வீட்டில் குடும்பம் நடத்தி வந்துள்ளார். இந்நிலையில் பணகுடி பகுதிக்கு கூலி வேலைக்காக சென்ற ஸ்டீபன் தனக்கு திருமணமானதை மறைத்து அப்பகுதியில் வசிக்கும் பத்தாம் வகுப்பு மாணவியை காதலித்துள்ளார். இதனையடுத்து அந்த மாணவியுடன் கடந்த சில தினங்களுக்கு முன்பு ஸ்டீபன் தலைமறைவானதால் அதிர்ச்சி அடைந்த பெற்றோர் மாணவியைத் பல இடங்களில் தேடி பார்த்துள்ளனர். அப்போதுதான் மாணவியை ஆசை வார்த்தை கூறி ஸ்டீபன் கடத்தி சென்றது மாணவியின் உறவினர்களுக்கு தெரியவந்துள்ளது.
இதுகுறித்து வள்ளியூர் அனைத்து மகளிர் காவல்நிலையத்தில் மாணவியின் பெற்றோர் புகார் அளித்தனர். அந்த புகாரின் பேரில் வழக்கு பதிவு செய்த காவல்துறையினர் இருவரையும் தீவிரமாக தேடி வந்துள்ளனர். அந்த சமயம் நாகர்கோவில் பகுதியில் கூலி வேலை செய்து கொண்டு அங்கேயே ஸ்டீபன் மாணவியுடன் தங்கி குடும்பம் நடத்தி வந்தது காவல்துறையினருக்கு தெரியவந்துள்ளது. இதனையடுத்து அங்கு விரைந்து சென்ற காவல்துறையினர் பத்தாம் வகுப்பு மாணவியை மீட்டு, ஸ்டீபனை கைது செய்துள்ளனர். அப்போது காவல்துறையினர் நடத்திய விசாரணையில், ஸ்டீபன் மேலும் இரண்டு இளம் பெண்களுடன் பழகி வந்தது தெரியவந்துள்ளது. அதன்பின் ஸ்டீபனை நீதிமன்றத்தில் காவல்துறையினர் ஆஜர்படுத்தி சிறையில் அடைத்து விட்டனர்.