கல்லணையிலிருந்து காவிரி மற்றும் கொள்ளிடம் ஆற்றில் உபரி நீர் வெளியேற்றப்படுவதால் கரையோரம் உள்ள கிராமங்களுக்கு அதிகாரிகள் எச்சரிக்கை விடுத்து வருகின்றனர்.
கல்லணையிலிருந்து காவிரி மற்றும் கொள்ளிடம் ஆற்றில் உபரி நீர் வெளியேற்றப்பட்டு வருகிறது. இந்நிலையில் வருவாய், பொதுப்பணித்துறை, ஊரக வளர்ச்சித் துறையின் சார்பில் தஞ்சை மாவட்டத்தில் உள்ள காவிரி ஆற்றின் கரையோரம் உள்ள கிராமங்களுக்கு எச்சரிக்கை விடுக்கப்பட்டு வருகிறது. மேலும் ஆற்றின் கரையோர பகுதிகளில் வசிப்பவர்களுக்கு ஒலிபெருக்கி மூலம் அறிவுறுத்தப்பட்டு வருகிறது. இந்நிலையில் நீரோட்டத்தில் வலுவிழக்கும் ஆற்றின் கரை பகுதிகளை பலப்படுத்துவதற்காக பொதுப்பணித் துறையின் சார்பில் அலுவலக வளாகத்தில் மணல் மூட்டைகள் தயார் நிலையில் வைக்கப்பட்டுள்ளன.
இதனையடுத்து கரையில் உடைப்பு ஏற்படும் நிலை வந்தால் அதனை சரிசெய்வதற்காக சவுக்கு கட்டைகளும் தயார் நிலையில் வைக்கப்பட்டுள்ளது. இதனைதொடர்ந்து காவிரியில் வெள்ளப்பெருக்கு ஏற்பட்டு வருவதால் கரைக்கு யாரும் செல்ல வேண்டாம் என அதிகாரிகள் எச்சரிக்கை விடுத்துள்ளனர். இந்நிலையில் அந்த பகுதியினர் காவிரி ஆற்றில் கரை புரண்டு ஓடும் தண்ணீரையும் ரசித்து வருகின்றனர். மேலும் காவிரி ஆற்றின் கரைகளை பொதுப்பணித் துறையினர் தொடர்ந்து கண்காணித்து வருகின்றனர்.