சுவைக்க தூண்டும் ”புதினா புலாவ்” செய்வது எப்படி ?

இன்றை அவசர உலகில் விதவிதமான சுவையான சமையல் செய்து கொடுக்க வேண்டிய கட்டாயம் ஏற்பட்டுள்ளது. பெற்றோர்கள், தங்கள் குழந்தைகளுக்கு எது கொடுத்தால் சாப்பிடுவார்கள்? என்ற ஐயமே அவர்களை புதிய புதிய சமையலை செய்ய தூண்டுகிறது. அவர்களுக்கு உதவும் விதமாக, புதினா புலாவ் தயாரிப்பது எப்படி? என்பதற்கான செய்முறையைக் கொடுத்துள்ளோம்.

தேவையான பொருட்கள்:

பாசுமதி அரிசி – 1 கப்

வெங்காயம் – 1 (நறுக்கியது)

உருளைக்கிழங்கு – 1 (நறுக்கியது)

இஞ்சி பூண்டு பேஸ்ட் – 3 தேக்கரண்டி

கிராம்பு – 2

ஏலக்காய் – 1

பட்டை – 1/2

நெய் – 1 மேசைக்கரண்டி

உப்பு – தேவையான அளவு

மசால் தயாரிப்பதற்கு தேவையான பொருட்கள்:

புதினா – 1 கட்டு

துருவிய தேங்காய் – 2 மேசைக்கரண்டி

தக்காளி – 1/2

பச்சை மிளகாய் – 1

செய்முறை:

முதலில் அரிசியை தண்ணீரில் ஒரு 20 நிமிடங்கள் நன்றாக ஊறவைத்து, பின்பு சுத்தமாக கழுவி தனியாக எடுத்து வைத்துக்கொள்ளவும். பின்பு மிக்சியில் புதினா, தேங்காய் துருவல், தக்காளி மற்றும் பச்சை மிளகாய் ஆகியவற்றை போட்டு பேஸ்ட்டு போல் நன்றாக அரைத்து கொள்ளவும்.

அடுத்ததாக, குக்கரை அடுப்பில் வைத்து, அதில் நெய் ஊற்றி காய்ந்ததும், ஏலக்காய், கிராம்பு, பட்டை சேர்த்து தாளித்து, பின் இஞ்சி பூண்டு பேஸ்ட் சேர்த்து 2 நிமிடம் வதக்கி, அடுத்து வெங்காயத்தைப் போட்டு பொன்னிறமாக வதக்க வேண்டும். பிறகு அரைத்து வைத்துள்ள பேஸ்ட் சேர்த்து, பச்சை வாசனை போக வதக்கி, பின் உருளைக்கிழங்கு, உப்பு மற்றும் அரிசியை சேர்த்து 3 நிமிடம் நன்கு கிளறி விட வேண்டும். இறுதியில் 1 1/2 கப் தண்ணீர் ஊற்றி, குக்கரை மூடி 10 நிமிடம் வேகவைத்து இறக்கினால், சுவையான புதினா புலாவ் தயார்.