தமிழகத்தில் இன்று மட்டும் கொரோனா பாதித்தவர்களில் 5,106 பேர் குணமடைந்து வீடு திரும்பியுள்ளது மக்களுக்கு மகிழ்ச்சியை ஏற்படுத்தியுள்ளது.
தமிழகத்தில் கொரோனா பாதிப்பு நாளுக்கு நாள் அதிகரித்துக் கொண்டே வருவது, மக்களுக்கு அதிர்ச்சியை அளிக்கும் வகையில் இருந்தாலும், குணமடைந்து வீடு திரும்புவோர் எண்ணிக்கையும் உயர்ந்து கொண்டே செல்வது மக்களுக்கு நம்பிக்கை அளிக்கும் வகையில் இருக்கின்றது. தமிழக அரசும் கொரோனாவை கட்டுப்படுத்த பல்வேறு கட்ட நடவடிக்கைகளை மேற்கொண்டு, உயிரிழப்புகளை குறைத்து, அதிகமானோரை குணப்படுத்த முனைப்பு காட்டி வருகிறது. அதன் பலனாக நாளுக்கு நாள் அதிகமானோர் கொரோனாவில் இருந்து மீண்டு வீடு திரும்பி வருகின்றனர்.
இந்நிலையில் இன்று கொரோனா பாதிப்பு குறித்த விவரங்கள் வெளியானது.. அதில், இன்று தமிழகத்தில் இதுவரை 107 பரிசோதனை மையங்கள் உள்ளன. இதில் 54 அரசு, 53 தனியார் ஆகும். இன்று மட்டும் 44,186 பேருக்கு பரிசோதனை செய்யப்பட்டுள்ளது. இதனால் மொத்த பரிசோதனை 17,09,459 ஆக இருக்கின்றது. இன்று புதிதாக 4,549 பேருக்கு தொற்று உறுதி செய்யப்பட்டுள்ளதால் பாதிக்கப்பட்டோர் எண்ணிக்கை 1,51,820 ல் இருந்து 1,56,369 ஆக அதிகரித்துள்ளது. இன்று ஒரே நாளில் 69 பேர் உயிரிழந்துள்ளதால், மொத்த எண்ணிக்கை 2,236 -ஆக அதிகரித்துள்ளது.
அதே நேரத்தில் இன்று மட்டும் 5,106 பேர் குணமடைந்து வீட்டுக்கு திரும்பியுள்ளனர். இதனால் இதுவரை கொரோனாவால் பாதிக்கப்பட்டு குணமடைந்தவர்களின் எண்ணிக்கை 1,02,310ல் இருந்து 1,07,416 ஆக உயர்ந்துள்ளது. இதனால் தொற்று அடைந்தவர்களில் இதுவரை 68.69 % பேர் குணமடைந்துள்ளனர்.
இன்று கொரோனா பாதிப்பை காட்டிலும் குணமடைந்து வீடு திரும்பியவர்களின் எண்ணிக்கை 5000த்தை தாண்டியிருப்பது மக்களுக்கு சற்று மகிழ்ச்சியையும், ஆறுதலையும் அளிக்கிறது.. நேற்று 5000 பேர் குணமடைந்து வீடு திரும்பியது குறிப்பிடத்தக்கது. தற்போது தமிழகத்தில் 46,714 பேர் மருத்துவமனையில் சிகிச்சை பெற்று வருகின்றனர்.