செங்கல்பட்டு அருகே விரித்த வலையில் மீனவர் சிக்கி பரிதாபமாக உயிரிழந்த சம்பவம் சோகத்தை ஏற்படுத்தியுள்ளது.
செங்கல்பட்டு மாவட்டம் கல்பாக்கம் அருகே உள்ள சதுரங்கப்பட்டினம் மெய்யூர் குப்பத்தை சேர்ந்தவர் பரசுராமன். இவர் மீனவர் தொழிலாளி ஆவார். இவர் நேற்று அதிகாலை 4 மணி அளவில் மீன்பிடிக்க கடலுக்குள் சென்றுள்ளார். சுமார் நான்கு கிலோமீட்டர் தொலைவில் சென்று மீன் வலையை விரித்த போது கால் தவறி கடலில் விழுந்துள்ளார். விழுந்தவுடன் வலையானது கை,கால்களில் சிக்கியதால் நீச்சலடிக்க முடியாமல் திணறிய அவர் சிறிது நேரத்தில் மூச்சு விட முடியாமல் பரிதாபமாக உயிரிழந்தார்.
அங்கே மீன் பிடிக்க வந்த சக மீனவர்கள் துடுப்பு படகு மட்டும் தனியாக மிதப்பதைக் கண்டு அதிர்ச்சி அடைந்து அருகே சென்று வலையை இழுத்து பார்த்தபோது வலைக்குள் பிணமாக கிடந்துள்ளார் பரசுராமன். இதையடுத்து செங்கல்பட்டு அரசு மருத்துவமனைக்கு தூக்கிச் சென்று காவல்நிலையத்தில் தகவல் தெரிவித்தனர். தகவல் அறிந்து சம்பவ இடத்திற்கு விரைந்த அவர்கள் அவரது உடலை பிரேத பரிசோதனைக்காக அனுப்பி வைத்துவிட்டு விபத்து குறித்து வழக்குப்பதிவு செய்து விசாரணை மேற்கொண்டு வருகின்றனர்.