பொங்கல் பரிசுத்தொகுப்பில்…. சீனிக்கு பதில் வெல்லம் கொடுங்கள் – விவசாயிகள் கோரிக்கை…!!

பொங்கல் பண்டிகையன்று வைக்கும் பொங்கலை தித்திக்கும் பொங்கலாக மாற்றுவது அச்சு வெல்லமாகும். பொங்கல் பண்டிகை நேரத்தில் அச்சு வெல்லம் தயாரிக்கும் விதமாக தஞ்சை மாவட்டம் அய்யம்பேட்டை சுற்றுப்புற கிராமங்களை சேர்ந்த விவசாயிகள் கரும்பு சாகுபடி செய்துள்ளனர். இந்நிலையில் தமிழக முதல்வர் ரூ. 2500 பொங்கல் பரிசுத்தொகையுடன் ஒரு கிலோ பச்சரிசி, சர்க்கரை, திராட்சை முந்திரி, 1 முழு கரும்பு ஆகியவை பொங்கல் தொகுப்பாக வழங்க உத்தரவிட்டுள்ளார்.

இந்நிலையில் பொங்கல் தொகுப்பில் சர்க்கரைக்கு பதிலாக வெல்லத்தை வழங்க வேண்டும் என கரும்பு விவசாயிகள் கோரிக்கை விடுத்துள்ளனர். இதுகுறித்து கணபதி அக்ரகாரம் கிராமத்தை சேர்ந்த விவசாயிகள் கூறுகையில், “தற்போது இந்த பகுதியில் மழை ஒய்ந்து வெயில் அடிக்க ஆரம்பித்துள்ளது. இதையடுத்து வெல்லம் தயாரிக்கும் பணிகள் தொடங்கப்பட்டுள்ளன.

இந்நிலையில் 30 கிலோ கொண்ட ஒரு சிப்பம் ரூ.1000 முதல் ரூ.1,500 வரை விலை போகின்றது. உரம் மற்றும் மூலப்பொருட்கள் விலை உயர்வால் இந்த விலை விவசாயிகளுக்கு முற்றிலும் கட்டுப்படியாகாது. எனவே அரசு வெல்லத்தை விவசாயிகளிடமிருந்து நேரடியாக கொள்முதல் செய்து சீனிக்கு பதிலாக பொங்கல் தொகுப்பில் வெல்லத்தை வழங்க வேண்டும். இதனால் விவசாயிகளுக்கும் ஓரளவு லாபகரமான விலை கிடைக்கும் என்று கூறியுள்ளனர்.