இந்திய அணியின் தொடக்க வீரர் ரோகித் சர்மாவை அடுத்த தோனி என கூறி இந்திய அணியின் ஆல்ரவுண்டர் ஆன சுரேஷ் ரெய்னா பெருமிதப்படுத்தியுள்ளார்.
இந்திய பெண்கள் கிரிக்கெட் அணி பேட்ஸ்மேன் ஜெமிமா ரோட்ரிக்யூஸ் மற்றும் தென்னாப்பரிக்கா பேட்ஸ்மேன் ஜேபி டுமினி ஆகியோர் தொகுத்து வழங்கிய வலையொளி ஒன்றில் இந்திய கிரிக்கெட் அணியின் ஆல்ரவுண்டர் சுரேஷ் ரெய்னா உரையாற்றினார்.. அதில் அவர் இந்திய கிரிக்கெட் அணியின் அடுத்த தோனியாக, தொடக்க பேட்ஸ்மேன் ரோஹித் சர்மா இருப்பதாக கூறியுள்ளார். இது பற்றி அவர் கூறுகையில், ரோஹித் சர்மா மிக அமைதியாக செயல்படுவதை நான் பார்த்திருக்கிறேன். மற்ற வீரர்கள் கருத்துகளை கவனிப்பது மட்டுமல்லாமல் அவர்களுக்கு உகுந்த நேரத்தில் நம்பிக்கையை அளிப்பார். அனைத்திற்கும் மேலாக முன்னின்று தலைமை ஏற்க விரும்பும் வீரராக திகழ்ந்து கொண்டிருக்கிறார்.
வீரர்களின் உடை மாற்றம் செய்யும் அறையில் அனைவருக்கும் மிகுந்த மரியாதை செலுத்துவார். அணியில் விளையாடும் வீரர்கள் அனைவரையும் கேப்டன் என கருதி விளையாடுபவர். அவரது தலைமையில் வங்கதேசத்தில் ஆசிய கோப்பையை வென்று இருக்கிறோம். அப்போது இளம் வீரர்களான ஷர்துல் தாக்கூர், வாஷிங்டன் சுந்தர், யுஸ்வேந்திர சாஹல் எவ்வாறு நம்பிக்கை அளித்தார் என நேரில் கண்டுள்ளேன். அவருடன் சேர்ந்து விளையாடுகையில் போட்டியின் தீவிரத்தை உணர்ந்து விளையாடலாம். மேலும் அவரிடம் வெளிப்படும் ஆற்றலானது நேர்மறையான எண்ணங்களை அளிக்க கூடியதாக இருக்கும். எம்.எஸ். தோனிக்கு பின்னர் அவரைப் போன்றே புத்திசாலி வீரராக திகழ்கிறார்.
அதே சமயத்தில் தோனியை விட அதிக ஐபிஎல் தொடர்களை வென்றவராகவும் திகழ்ந்து கொண்டிருக்கிறார். ஒரு அணியின் கேப்டன் வீரர்களின் பிரச்னைகள் கேட்டறிந்து அதை சரி செய்யவேண்டும். அவ்வாறு செய்தால் வீரர்கள் அனைவரும் மனரீதியான பிரச்னைகளிலிருந்து தீர்வு காண்பார்கள். அந்தவகையில் ரோஹித்தை அடுத்த தோனி என்றே கூறுவேன்” என்று ரெய்னா கூறியுள்ளார்.