தென் ஆப்பிரிக்காவுக்கு எதிரான கடைசி டெஸ்ட் போட்டியில் இந்திய அணி வெற்றி பெற இன்னும் இரண்டு விக்கெட்டுகள் மட்டுமே எடுக்க வேண்டிய நிலையில் மூன்றாம் ஆட்டநாள் முடிவுக்கு வந்துள்ளது.
ராஞ்சியில் நடைபெற்றுவரும் தென் ஆப்பிரிக்காவுக்கு எதிரான கடைசி டெஸ்ட் போட்டியின் முதல் இன்னிங்ஸில் இந்திய அணி 497 ரன்களை சேர்த்தது. இந்திய அணியில் அதிகபட்சமாக ரோகித் சர்மா 212 ரன்கள் அடித்தார். இதைத்தொடர்ந்து தனது முதல் இன்னிங்ஸை விளையாடிய தென் ஆப்பிரிக்க அணி, இந்திய அணியின் பந்துவீச்சை சமாளிக்க முடியாமல் 162 ரன்களுக்கு ஆல் அவுட்டானது.
இதனால் 335 ரன்கள் பின்தங்கிய நிலையில், தென் ஆப்பிரிக்க அணி ஃபாலோ- ஆன் பெற்றது. இந்த நிலையில், தனது இரண்டாவது இன்னிங்ஸில் பேட்டிங் செய்துவரும் தென் ஆப்பிரிக்க அணி மீண்டும் இந்திய அணியின் பந்துவீச்சை சமாளிக்க முடியாமல் திணறுகிறது. டி காக், ஹம்சா, டூ பிளஸிஸ், டெம்பா பவுமா, ஹென்ரிச் கிளாசன் ஆகியோர் சொற்ப ரன்களில் ஆட்டமிழந்தனர்.
மூன்றாம் ஆட்டநாள் முடிகின்ற நேரத்தில் தென் ஆப்பிரிக்க அணி ஒரு கட்டத்தில் எட்டு விக்கெட்டுகளை இழந்தது. இந்திய அணி வெற்றிபெற இன்னும் இரண்டு விக்கெட்டுகள் தேவை என்பதால், இன்றைய ஆட்டநாளில் கூடுதலான நேரம் வழங்கப்பட்டது.
எனினும் போதுமான வெளிச்சம் இல்லாத காரணத்தால் இன்றைய ஆட்டம் முடிவுக்கு வந்தது. மூன்றாம் ஆட்டநாள் முடிவில் தென் ஆப்பிரிக்க அணி 132 ரன்களுக்கு எட்டு விக்கெட்டுகளை இழந்துள்ளது. டீ ப்ரூயின் 30 ரன்களிலும், அன்ரிச் நார்டே ஐந்து ரன்களிலும் களத்தில் உள்ளனர்.
இந்திய அணி சார்பில் முகமது ஷமி மூன்று, உமேஷ் யாதவ் இரண்டு, ஜடேஜா, அஸ்வின் ஆகியோர் தலா ஒரு விக்கெட்டை கைப்பற்றினர். இந்திய அணி இப்போட்டியில் வெற்றிபெற இன்னும் இரண்டு விக்கெட்டுகள் மட்டுமே தேவை. இந்த நிலையில், இன்னிங்ஸ் வெற்றிக்காக இந்திய அணி நாளை வரை காத்திருக்க வேண்டிய சூழல் ஏற்பட்டுள்ளது.