IPL 2022 தொடரில் நேற்று முன்தினம் நடந்த 22வது லீக் ஆட்டத்தில் சென்னை சூப்பர் கிங்ஸ், ராயல் சேலஞ்சர்ஸ் பெங்களூரூ அணிகள் மோதி கொண்டது. இப்போட்டியில் சென்னை அணியானது 23 ரன்கள் வித்தியாசத்தில் வெற்றியடைந்தது. இந்த போட்டியில் முதலாவதாக பேட்டிங் பிடித்த சென்னை நிர்ணயிக்கப்பட்ட 20 ஓவர்களில் 216 ரன்கள் குவித்தது. இதையடுத்து 217 என்ற இமாலய இலக்கை துரத்திய பெங்களூருவுக்கு தொடக்கவீரர் மற்றும் கேப்டன் டு பிளசிஸ் 8 (9) ரன்களில் அவுட்டாக அடுத்துவந்த விராட் கோலி 1 (3) ரன்னில் அவுட்டாகி அதிர்ச்சியளித்தார். முடிவில் பெங்களூரு அணியானது 23 ரன்கள் வித்தியாசத்தில் தோல்வியடைந்தது.
இந்தநிலையில் நேற்று முன்தினம் விராட்கோலியின் விக்கெட்டை வீழ்த்த டோனி போட்ட திட்டம் குறித்த வீடியோ தற்போது சமூகவலைதளைங்களில் வைரலாகி வருகிறது. 2வது இன்னிங்சின் 4-வது ஓவரை இளம்வீரர் முகேஷ் சவுத்ரி வீச வந்த சூழ்நிலையில், அதனை விராட் கோலி எதிர்கொண்டார். அதற்கு முன் டீப் ஸ்கொயர் லெக் பகுதியில் எந்த பீல்டரும் இல்லாததை பார்த்த எம்எஸ் டோனி அந்த இடத்தில் அவர் பிளிக் ஷாட் அடிக்க அதிக வாய்ப்பு இருக்கிறது என்பதை கணித்து ஷிவம் துபேவை அங்கே நிறுத்தினார். பின் அடுத்தபந்திலேயே சொல்லி வைத்தது போன்று பிளிக் ஷாட் விளையாடிய விராட் கோலி தோனியின் பிளானில் சிக்கி சிவம் துபேவிடம் கேட்ச் கொடுத்து ஆட்டம் இழந்தார். இது தொடர்பான வீடியோவானது இணையத்தில் வைரலாகி வரும் நிலையில், கிரிக்கெட் ரசிகர்கள் பலரும் தற்போது டோனியை புகழ்ந்து வருகின்றனர்.