ஐசரி கணேஷ் நடிகர் சங்க தேர்தலில் நிற்கும் தகுதியை இழந்து விட்டார் என்று பாண்டவர் அணி பூச்சிமுருகன் விமர்சித்துள்ளார்.
தென்னிந்திய நடிகர் சங்கத்தின் 2019- 2022_ஆம் ஆண்டுக்கான தேர்தல் பல்வேறு தடைகளை தாண்டி நாளை நடைபெற உள்ளது. இதில் நாசர் , விஷால் தலைமையிலான பாண்டவர் அணியும் , கே.பாக்யராஜ் , ஐசரி கணேஷ் தலைமையிலான ஸ்வாமி சங்கரதாஸ் அணியும் போட்டியிடுகின்றன. சட்ட ஒழுங்கு பிரச்சனையை காரனம் காட்டி தேர்தலுக்கு போலீஸ் பாதுகாப்பு வழங்க காவல்துறை மறுப்பு தெரிவித்த நிலையில் , நடிகர் விஷால் தேர்தலுக்கு பாதுகாப்பு கேட்டு சென்னை உயர்நீதிமன்றத்தில் மனுதாக்கல் செய்தார்.
அவசர வழக்காக விசாரிக்கப்பட்டதில் , நடிகர் சங்க தேர்தலை சென்னை மயிலாப்பூரில் உள்ள புனித எப்பாஸ் பள்ளியில் நடத்தவும் , மயிலாப்பூர் காவல் துணை ஆணையர் உரிய பாதுகாப்பை வழங்க வேண்டும் என்று சென்னை உயர்நீதிமன்றம் உத்தரவிட்டது. இதையடுத்து செய்தியாளர்களை பாண்டவர் அணியினர் சந்திக்கும் போது பூச்சிமுருகன் கூறுகையில் , ஐசரி கணேஷ் நடிகர் சங்க தேர்தல் குறித்து அவமதிப்பு வழக்கு போடப்பட்டதால் தேர்தலில் நிற்கும் தகுதியை இழந்து விட்டார் என்று விமர்சித்துள்ளார்.