செளந்தர்யா ரஜினிகாந்தின் Hoote செயலியை இன்று நடிகர் ரஜினிகாந்த் துவங்கி வைத்தார்.
நடிகர் ரஜினிகாந்த் நேற்று ஒரு அறிக்கை வெளியிட்டு இருந்தார். அதில் நாளை எனக்கு இரண்டு முக்கிய நிகழ்வுகள் உள்ளது என்றும், ஒன்று அன்பினாலும், ஆதரவினாலும் திரையுலகின் உயர்ந்த விருதான தாதா சாஹேப் பால்கே விருதை மத்திய அரசு வழங்க உள்ளது என்றும், இரண்டாவது எனது மகள் சௌந்தர்யாவின் சொந்த முயற்சியில் உருவாகியுள்ள மக்களுக்கு மிகவும் பயன்படக்கூடிய “HOOTE” என்கிற செயலியை அறிமுகப்படுத்த உள்ளதாக கூறியிருந்தார். அதன்படி இன்று மத்திய அரசு வழங்கிய தாதா சாகேப் பால்கே விருதினை வாங்கிய கையுடன் தனது மகளின் “HOOTE” செயலியையும் அறிமுகப்படுத்தி வைத்துள்ளார்.
இது குறித்து நடிகர் ரஜினிகாந்தின் மகள் சௌந்தர்யா ரஜினிகாந்த் தெரிவித்துள்ளதாவது: “தனது சொந்த முயற்சியில் உருவான “HOOTE” செயலியை எனது தந்தை கையால் துவக்கி வைத்தது எனக்கு மிகுந்த மகிழ்ச்சி. முன்பெல்லாம் என் அப்பாவுக்கு தமிழ் எழுத வராது. முன்பு அவர் கட்சி தொடங்குவது சார்ந்த ட்வீட் போடுவதற்கு எனக்கு வாய்ஸ் நோட் அனுப்புவார். அப்போது பிறந்த யோசனை தான் Hoote செயலி. இதனால் மக்கள் தாங்கள் மற்றவர்களுக்கு எழுத்து மூலம் தெரிவிக்க விரும்பும் கருத்துகளை, அவர்களது குரலிலேயே எந்த மொழியிலும் “HOOTE APP” மூலமாக பதிவிடலாம்” என்று தெரிவித்தார்.