திருச்சி நவல்பட்டு எஸ்ஐ பூமிநாதன் கொலை வழக்கில் கைதான மணிகண்டனுக்கு ஒரு நாள் போலீஸ் காவல் கொடுத்து கீரனூர் நீதிமன்றம் உத்தரவிட்டுள்ளது.
புதுக்கோட்டை அருகே ஆடு திருடி அவர்களை பிடிக்க சென்ற திருச்சி நவல்பட்டு போலீஸ் சப்-இன்ஸ்பெக்டர் பூமிநாதன் வெட்டிக்கொலை செய்யப்பட்ட சம்பவம் பெரும் பரபரப்பை ஏற்படுத்தியிருந்தது. இந்த சம்பவத்தில் ஈடுபட்ட கொலையாளிகளை பிடிப்பதற்கு 8 தனிப்படைகள் அமைக்கப்பட்டு தீவிர நடவடிக்கைகள் மேற்கொள்ளப்பட்டு வந்தது. தனிப்படையை சார்ந்த காவல்துறையினர் திருச்சி மாவட்ட எல்லைப் பகுதிகளிலும், அதன் சுற்றுவட்டாரப் பகுதிகளிலும் மர்ம நபர்களை வலைவீசி தேடிவந்தனர்.
பிறகு பூமிநாதன் கொலை செய்யப்பட்ட வழக்கில் இரண்டு சிறுவர்கள் உள்ளிட்ட மூன்று பேரை தனிப்படையினர் கைது செய்தனர். இதில் எஸ்ஐ-யை கொலை செய்த இளைஞர் மணிகண்டனை 15 நாள் நீதிமன்ற காவலில் அடைக்க கீரனூர் நீதிபதி உத்தரவிட்டு இருந்த நிலையில், இன்று மணிகண்டனை ஒரு நாள் மட்டும் காவலில் எடுத்து விசாரணை செய்ய காவல்துறையினருக்கு கீரனூர் நீதிமன்றம் அனுமதி வழங்கியுள்ளது.