தென்காசி அருகே காவல் துறைக்கு சொந்தமான நிலத்தில் போலி ஆவணங்கள் மூலம் விற்பனை செய்த விவகாரத்தில் பத்திரப் பதிவுத் துறை ஊழியர் ஒருவர் சஸ்பெண்ட் செய்யப்பட்டுள்ளார்.
தென்காசி மாவட்டம் சுரண்டையில் சங்கரன்கோவில் பிரதான சாலை அருகே காவல் துறைக்கு சொந்தமான இரண்டு ஏக்கர் நிலம் உள்ளது. இந்த இடத்தில் காவலர் குடியிருப்பு கட்டடம் திட்டமிடப்பட்டிருந்த நிலையில் சிலர் போலி ஆவணங்கள் தயாரித்து அந்த நிலத்தையே விற்பனை செய்து உள்ளனர். இதுகுறித்து சுரண்டை கிராம நிர்வாக அலுவலர் அளித்த புகாரின் பேரில் சார்பதிவாளர் அலுவலக ஊழியர்கள் ராஜேந்திரன், மனோகர் உட்பட 13 பேர் மீது வழக்கு பதிவு செய்யப்பட்டது.
கடந்த மாதம் 7 பேர் கைது செய்யப்பட்ட நிலையில் தலைமறைவாக இருந்த சார்பதிவாளர் அலுவலக ஊழியர் ராஜேந்திரன் கடந்த 17ஆம் தேதி பிடிபட்டார். இந்த நிலையில் மோசடிக்கு துணை போன ராஜேந்திரனை சஸ்பெண்ட் செய்து பத்திரப் பதிவுத் துறை துணைத் தலைவர் ஆறுமுகம் உத்தரவிட்டுள்ளார்.