கள்ளக்காதலை கைவிட மறுத்ததால் மனைவியை கணவன் கொலை செய்த சம்பவம் பரபரப்பை ஏற்படுத்தியுள்ளது.
தேனி மாவட்டத்திலுள்ள அழகர்சாமி நகர் பகுதியில் ராஜேஷ்குமார் என்பவர் வசித்து வருகிறார். இவர் பெயிண்டராக உள்ளார். இவருக்கு பிரபா என்ற மனைவி இருந்துள்ளார். இவர் சீலையம்பட்டியில் உள்ள தனியார் நூற்பாலையில் டெய்லராக வேலை செய்து வந்துள்ளார். இந்த தம்பதியினருக்கு ராகவன், பிரவீன் என்ற 2 மகன்கள் உள்ளனர். கடந்த சில நாட்களாக கணவன்-மனைவி இடையே தகராறு ஏற்பட்டு வந்துள்ளது. இந்நிலையில் பிரபா மர்மமான முறையில் இறந்து கிடந்துள்ளார். இதுகுறித்து தகவல் அறிந்த சின்னமனூர் காவல்துறையினர் சம்பவ இடத்திற்கு விரைந்து சென்று பிரபாவின் உடலை கைப்பற்றி தேனி அரசு மருத்துவ கல்லூரி மருத்துவமனைக்கு பிரேத பரிசோதனைக்காக அனுப்பி வைத்துள்ளனர்.
இதுகுறித்து பிரபாவின் தந்தை ஜெயராமன் கொடுத்த புகாரின்பேரில் வழக்குப்பதிவு செய்த காவல்துறையினர் விசாரணை நடத்தினர். இதற்கிடையே மருத்துவமனையில் இருந்து வந்த பிரேத பரிசோதனை அறிக்கையில் பிரபாவை கழுத்தை நெரித்து கொலை செய்தது தெரியவந்துள்ளது. இதுகுறித்த சந்தேகத்தின்பேரில் காவல்துறையினர் அவரது கணவர் ராஜேஷ்குமாரை பிடித்து விசாரணை நடத்தினர் அந்த விசாரணையில் பல்வேறு திடுக்கிடும் தகவல்கள் வெளியானது. இதுகுறித்து காவல்துறையினர் கூறுவதாவது, பிரபா வேலை பார்க்கும் நூற்பாலைக்கு அடிக்கடி ஒரே ஆட்டோவில் சென்று வந்துள்ளார். அப்போது பிரபாவுக்கும், ஆட்டோ டிரைவரான கோட்டூர் பகுதியில் வசிக்கும் பிரசாத் என்பவருக்கும் இடையே பழக்கம் ஏற்பட்டுள்ளது.
இந்த பழக்கம் நாளடைவில் கள்ளக்காதலாக மாறியது. இதுகுறித்து ராஜேஷ்குமாருக்கு தெரியவந்ததால் பிரபாவை அவர் கண்டித்தார். இருப்பினும் பிரபா தனது கள்ளக்காதலை கைவிடாமல் தொடர்ந்து வந்துள்ளார். இந்நிலையில் ராஜேஷ்குமார் பிரபாவிடம் கள்ளக்காதலை கைவிடுமாறு கூறி வாக்குவாதத்தில் ஈடுபட்டுள்ளார். இதனால் கணவன்-மனைவி இடையே மீண்டும் தகராறு ஏற்பட்டுள்ளது. இதில் ஆத்திரமடைந்த ராஜேஷ்குமார் பிரபாவை கழுத்தை நெரித்து கொலை செய்துள்ளார். இதனையடுத்து ராஜேஷ்குமார் தனது மனைவி மாரடைப்பு ஏற்பட்டு இறந்ததாக கூறி நாடகமாடியதும் காவல்துறையினருக்கு தெரியவந்தது. இதனைதொடர்ந்து காவல்துறையினர் ராஜேஷ்குமாரை கைது செய்துள்ளனர்.