ஐஎஸ்எல் கால்பந்து தொடரில் இன்று நடைபெறும் லீக் ஆட்டத்தில் ஐதராபாத் எஃப்சி அணி ஒடிசா எஃப்சி அணியுடன் விளையாட உள்ளது.
இந்தியன் சூப்பர் லீக் கால்பந்து தொடரின் ஏழாவது சீசன் இறுதிக் கட்டத்தை நெருங்கிக் கொண்டிருக்கிறது.இன்று நடைபெறும் லீக் போட்டியின் புள்ளி பட்டியலில் நான்காவது இடத்தில் இருக்கும் ஹைதராபாத் அணி புள்ளி பட்டியலில் கடைசி இடத்தில் இருக்கும் ஒடிசா அணியுடன் விளையாடவுள்ளது. ஜவஹர்லால் நேரு மைதானத்தில் நடைபெற உள்ள இந்த போட்டி இந்திய நேரப்படி இரவு 7.30 மணிக்கு தொடங்குகிறது.
கடந்த சீசனில் அறிமுகமான ஹைதராபாத் அணி இந்த சீசனின் தொடக்கம் முதலே சிறப்பாக விளையாடி வருகிறது. இதுவரை 11 லீக் போட்டிகளில் விளையாடியுள்ள ஹைதராபாத் அணி 4 முறை வெற்றியும் 3 முறை தோல்வியும் அடைந்துள்ளது. மேலும் 4 போட்டிகளை டிராவில் முடித்துள்ளது. இதன் மூலம் 16 புள்ளிகளை பெற்று ஐஎஸ்எல் புள்ளி பட்டியலில் ஹைதராபாத் அணி நான்காவது இடத்தில் உள்ளது.
இனிவரும் போட்டிகளில் வெற்றி பெற்று ஹைதராபாத் அணி பிளே ஆஃப் சுற்றுக்கு முன்னேறும் என்று ரசிகர்கள் எதிர்பார்த்து காத்திருக்கின்றனர். இதற்கிடையே இந்த சீசனில் ஒடிசா அணி படுதோல்வியை சந்தித்து வருகிறது. இதுவரை 11 லீக் ஆட்டங்களில் விளையாடியுள்ள ஒடிசா அணி ஒரு முறை மட்டுமே வெற்றியை பெற்றுள்ளது. இதனால் ஐஎஸ்எல் புள்ளி பட்டியலில் வெறும் 6 புள்ளிகளை மட்டுமே பெற்று கடைசி இடத்தில் உள்ளது. இதனால் இப்போட்டியில் வெற்றி பெற்று எந்த அணி புள்ளிப்பட்டியலில் முன்னேறும் என்ற எதிர்பார்ப்பு ரசிகர்கள் மத்தியில் அதிகமாக உள்ளது.