கமிஷன் கடைகளில் பழங்கள் மற்றும் காய்கறிகள் விற்பனைக்கு குவிந்ததால் விவசாயிகள் மகிழ்ச்சியில் உள்ளனர்.
புதுக்கோட்டை மாவட்டத்தில் அணவயல், பனங்குளம், குளமங்கலம், கீரமங்கலம் போன்ற பல சுற்றுவட்டார பகுதிகளில் தானியங்கள், பழங்கள் மற்றும் காய்கறிகள் போன்றவற்றை விவசாயிகள் சாகுபடி செய்கின்றனர். இதனை அடுத்து கொரோனா தொற்று அதிகமாக பரவி வருவதால் தமிழக அரசு ஊரடங்கை அமல்படுத்தியது. இதனால் தொழிலில் நிலையான வியாபாரம் இல்லாமல் விவசாயிகள் மிகவும் சிரமத்தில் இருந்துள்ளனர்.
இந்நிலையில் ஊரடங்கில் சில தளர்வுகள் அளிக்கப்பட்டதால் கொத்தமங்கலம், கீரமங்கலம் போன்ற பகுதிகளில் உள்ள காய்கனி கமிஷன் கடைகளுக்கு காய்கறிகள், பழங்கள், தேங்காய்கள் போன்றவை விற்பனைக்கு குவிந்துள்ளது. மேலும் கமிஷன் கடைகளில் உள்ள காய்கறிகள், பழங்கள் போன்றனவற்றை கொள்முதல் செய்து மதுரை, அறந்தாங்கி, புதுக்கோட்டை, பட்டுக்கோட்டை, பேராவூரணி போன்ற பல ஊர்களுக்கு அனுப்புகின்றனர்.