குடும்பத் தகராறில் காவலர் தூக்கிட்டு தற்கொலை செய்துகொண்ட சம்பவம் பரபரப்பை ஏற்படுத்தியுள்ளது.
வேலூர் மாவட்டத்திலுள்ள காட்டுப்புத்தூர் பகுதியில் அருண்குமார் என்பவர் வசித்து வந்துள்ளார். இவர் திருப்பூர் மாவட்டத்திலுள்ள பல்லடம் காவல்நிலையத்தில் காவலராக பணியாற்றி வந்துள்ளார். இந்நிலையில் அருண்குமார் தனது பெற்றோருக்கு உடல்நலக்குறைவு ஏற்பட்டதால் அவர்களைப் பார்ப்பதற்காக 3 நாட்கள் விடுமுறையில் தனது ஊருக்கு வந்துள்ளார். இதனையடுத்து அவரது குடும்பத்தில் தகராறு ஏற்பட்டுள்ளது. இதனால் மன அழுத்தத்தில் இருந்த அருண்குமார் திடீரென அவரது வீட்டில் தூக்கிட்டு தற்கொலை செய்து கொண்டார்.
இதனைப்பார்த்து அதிர்ச்சியடைந்த அவரது குடும்பத்தினர் அருண்குமாரை உடனடியாக மீட்டு தனியார் மருத்துவமனைக்கு சிகிச்சைக்காக அனுமதித்தனர். ஆனால் அருண்குமாரை பரிசோதனை செய்த மருத்துவர்கள் அவர் ஏற்கனவே இறந்ததாக தெரிவித்துள்ளனர். இதுகுறித்து அரியூர் காவல்நிலையத்தில் புகார் அளிக்கப்பட்டது. அந்த புகாரின் பேரில் வழக்குப்பதிவு செய்த காவல்துறையினர் இச்சம்பவம் குறித்து விசாரணை மேற்கொண்டு வருகின்றனர்.