மதுபாட்டில்களை ஆட்டோவில் கடத்திய வாலிபரை காவல்துறையினர் கைது செய்தனர்.
திருப்பத்தூர் மாவட்டத்தில் உள்ள மேட்டுப்பாளையம் பகுதியில் மது பாட்டில்களை பதுக்கி வைத்து கூடுதல் விலைக்கு விற்பனை செய்வதாக மாவட்ட போலீஸ் சூப்பிரண்டு சிபிசக்கரவர்த்தி ரகசிய தகவல் கிடைத்துள்ளது. அந்த தகவலின்படி வாணியம்பாடி-திம்மாம்பேட்டை சாலையில் தனிப்படை காவல்துறையினர் தீவிர வாகன சோதனையில் ஈடுபட்டிருந்தனர். அப்போது அவ்வழியாக வந்த ஒரு ஆட்டோவை காவல்துறையினர் நிறுத்தி சோதனை மேற்கொண்டனர்.
அந்த சோதனையில் ஆட்டோவில் மது பாட்டில்கள் இருந்தது காவல்துறையினருக்கு தெரியவந்தது. இதனையடுத்து காவல்துறையினர் ஆட்டோவில் வந்தவரிடம் விசாரணை மேற்கொண்டதில் அவர் மேட்டுப்பாளையத்தை சேர்ந்த ராஜ்மகேஷ் என்பதும், திம்மாம்பேட்டையில் இருந்து வாணியம்பாடிக்கு 11 அட்டை பெட்டிகளில் 550 மதுபாட்டில்கள் கூடுதல் விலைக்கு விற்பனை செய்வதற்காக கடத்தி வந்ததும் தெரியவந்துள்ளது. அதன்பின் காவல்துறையினர் ஆட்டோவுடன் மது பாட்டில்களை பறிமுதல் செய்ததோடு, ராஜ் மகேசை கைது செய்தனர்.