கிணற்றுக்குள் தவறி விழுந்த விவசாயியை உயிருடன் தீயணைப்புத்துறை வீரர்கள் மீட்டெடுத்துள்ளனர்.
ராமநாதபுரம் மாவட்டத்தில் உள்ள வீரஆலங்குளம் பகுதியில் விவசாயியான குமரேசன் என்பவர் வசித்து வருகிறார். கடந்த ஜூலை 10 – ஆம் தேதியன்று குமரேசன் ஆடுகளுக்கு இறைதேடி தனது தோட்டத்திற்கு சென்றுள்ளார். அப்போது அவர் எதிர்பாராத விதமாக நிலைதடுமாறி அங்கிருந்த கிணற்றுக்குள் தவறி விழுந்துவிட்டார். இதனை அடுத்து குமரேசன் நீண்ட நேரமாக வீடு திரும்பாத காரணத்தினால் உறவினர்கள் அவரின் தோட்டத்திற்கே சென்று தேடி பார்த்துள்ளனர்.
அப்போது குமரேசன் கிணற்றில் தவறி விழுந்து உயிருக்கு போராடியது தெரியவந்துள்ளது. இதனைத் தொடர்ந்து உறவினர்கள் தீயணைப்புத்துறை வீரர்களுக்கு தகவல் தெரிவித்துள்ளனர். இது குறித்து தகவல் அறிந்த தீயணைப்புத் துறை வீரர்கள் சம்பவ இடத்திற்கு விரைந்து சென்று குமரேசனை உயிருடன் மீட்டு அரசு மருத்துவமனைக்கு சிகிச்சைக்காக அனுப்பி வைத்துள்ளனர். இச்சம்பவம் குறித்து வழக்குப்பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.