நண்பர்களுடன் மது அருந்த சென்ற கூலித் தொழிலாளி மர்மமான முறையில் உயிரிழந்த சம்பவம் பரபரப்பை ஏற்படுத்தியுள்ளது.
ராணிப்பேட்டை மாவட்டத்தில் உள்ள அவினாசி கண்டிகை கிராமத்தில் அருண் என்பவர் வசித்து வந்துள்ளார். இவர் கூலித் தொழிலாளியாக வேலை பார்த்து வந்துள்ளார். இந்நிலையில் நண்பர்களுடன் மது குடித்து விட்டு நீண்ட நேரம் ஆகியும் வீட்டிற்கு வராத காரணத்தினால் குடும்பத்தினர் அவரை அனைத்து பகுதிகளிலும் தேடி பார்த்துள்ளனர். அப்போது பச்சையம்மன் கோவில் அருகாமையில் மர்மமான முறையில் அருண் இறந்து கிடந்ததை கண்டு குடும்பத்தினர் அதிர்ச்சி அடைந்துள்ளனர்.
அதன்பின் மதுபோதையில் கீழே விழுந்து இறந்திருக்கலாம் என எண்ணி குடும்பத்தினர் அவருடைய உடலை அடக்கம் செய்ததாக தெரியவந்துள்ளது. இதனையடுத்து அருண் சாவில் சந்தேகம் ஏற்பட்டதால் அவரின் தந்தை கோவிந்தராஜ் காவல்நிலையத்தில் புகார் கொடுத்துள்ளார்.
அந்த புகாரின் பேரில் வழக்குப்பதிவு செய்த காவல்துறையினர் புதைக்கப்பட்டிருந்த அருண் உடலை தோண்டி எடுத்து பிரேத பரிசோதனைக்காக அரசு மருத்துவமனைக்கு அனுப்பி வைத்துள்ளனர். இதனைத் தொடர்ந்து காவல்துறையினர் அருணுடன் இணைந்து மது குடித்த நபர்களை பிடித்து அவரின் மரணம் குறித்து தீவிர விசாரணை மேற்கொண்டு வருகின்றனர்.