கர்நாடக மாநிலம் தும்கூர் மாவட்டத்தின் நீட்டூர் கிராமத்தில் உள்ள முளுகட்டம்மா கோயில் உள்ளது. இந்த கோயிலில் தலித் சமுதாயத்தை சேர்ந்த ஒரு குடும்பம் கோயிலுக்கு பூஜை செய்ய சென்றது. மாலை தேங்காய் உடன் அவர்கள் கோவிலுக்கு சென்றனர். அப்போது கோவிலில் இருந்த அர்ச்சகர் அவர்களை தடுத்து நிறுத்தினார். அதுமட்டுமில்லாமல் அந்த குடும்பத்தினரை அர்ச்சகர் கோவிலை விட்டு வெளியேறுமாறு வலியுறுத்தியதுடன் கோவிலுக்கு உள்ளே வரக்கூடாது என்று கூறியதாக கூறப்படுகிறது.
ஏன் கோயிலுக்குள் வரக்கூடாது என்று அவர்கள் கேள்வி எழுப்பிய போது, உங்களுக்கு எல்லாம் பூஜை செய்ய முடியாது என்று கூறி விரட்டிய அடித்ததாக கூறப்படுகிறது. இது குறித்து கோயிலில் இருந்த ஒருவர் வீடியோ எடுத்து சமூக வலைதளங்களில் பதிவிட்டுள்ளார். இந்த வீடியோ தற்போது வைரலாக பரவி வருகிறது. இதனையடுத்து இந்த சம்பவம் குறித்து தும்கூர் போலீசார் விசாரணை மேற்கொண்டு வருகின்றனர். மேலும் கோயிலில் வழிபாடு செய்ய வந்த தலித் குடும்பத்தினரை வெளியே போக சொன்ன அர்ச்சகர் மீது நடவடிக்கை எடுக்க வேண்டும் என்று பொதுமக்கள் வலியுறுத்தி உள்ளனர்.