கிணற்றில் மூழ்கி மாணவன் உயிரிழந்த சம்பவம் சோகத்தை ஏற்படுத்தியுள்ளது.
தர்மபுரி மாவட்டத்திலுள்ள கரியம்பட்டியில் விவசாயி சிலம்பரசன் வசித்து வருகிறார். இவருக்கு அஸ்வின் என்ற மகன் இருந்தார். இவர் அதே பகுதியில் உள்ள பள்ளியில் 3-ம் வகுப்பு பயின்று வந்தார். இந்நிலையில் அஸ்வின் தனது அண்ணன் அகிலன் மற்றும் நண்பர்களுடன் கரியம்பட்டி பகுதியில் உள்ள ஒரு கிணற்றில் குளிக்கச் சென்றார். அப்போது எதிர்பாராமல் மாணவன் அஸ்வின் தண்ணீரில் மூழ்கினார். இதனால் அதிர்ச்சியடைந்த அகிலன் மற்றும் அவரது நண்பர்கள் கிணற்றிலிருந்து மேலே வந்து பொதுமக்களுக்கு தகவல் தெரிவித்தனர். அதன்பின் பொதுமக்கள் தீயணைப்பு நிலையம் மற்றும் அகிலனின் பெற்றோருக்க்கு இதுகுறித்து தகவல் தெரிவித்தனர்.
அந்த தகவலின்படி தீயணைப்பு வீரர்கள் சம்பவ இடத்திற்கு விரைந்து சென்று மாணவனை தேடும் முயற்சியில் ஈடுபட்டனர். இதனைதொடர்ந்து சுமார் 2 மணி நேர போராட்டத்திற்கு பிறகு மாணவன் அஸ்வின் இறந்த நிலையில் சடலமாக மீட்கப்பட்டார். அப்போது அங்கு திரண்டு இருந்த பெற்றோர் மற்றும் உறவினர்கள் அஸ்வின் உடலை பார்த்து கதறி அழுதனர். அதன்பின் காவல்துறையினர் மாணவனின் சடலத்தை கைப்பற்றி பிரேத பரிசோதனைக்காக அரசு மருத்துவமனைக்கு அனுப்பி வைத்தனர். இது தொடர்பாக காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.