கார் மோதிய விபத்தில் வாலிபர் பலியாகிய சம்பவம் சோகத்தை ஏற்படுத்தியுள்ளது.
தூத்துக்குடி மாவட்டத்திலுள்ள திரேஸ்புரம் பள்ளிவாசல் பகுதியில் ஆட்டோ டிரைவரான சும்சுதீன் என்பவர் தனது குடும்பத்துடன் வசித்து வருகின்றார். இவருக்கு செய்யது அலி பாத்திமா என்ற மனைவி உள்ளார். இந்த தம்பதிகளுக்கு பட்டப்படிப்பு படிக்கும் இஜாஸ் முகமது என்ற மகனும், ஒரு மகளும் இருக்கின்றனர். இந்நிலையில் சுமிசுதன், மனைவி மற்றும் தனது மகன், மகளுடன் தாமிரபரணி ஆற்றுக்கு குளிப்பதற்காக ஆம்னி வேனில் சென்றுள்ளனர். இதனையடுத்து இஜாஸ் முகமது குளித்த பிறகு வேன் இருக்கும் இடத்திற்கு அப்பகுதியில் நடந்து சென்று கொண்டிருந்தார்.
அப்போது அவ்வழியாக வேகமாக சென்ற கார் இஜாஸ் முகமதின் மீது மோதியதால் அவர் பலத்த காயமடைந்து உயிருக்காகப் போராடிக் கொண்டிருந்தார். இதனையடுத்து அருகிலிருந்தவர்கள் அவரை உடனடியாக மீட்டு சிகிச்சைக்காக அரசு மருத்துவமனைக்கு கொண்டு செல்லும் வழியிலேயே இஜாஸ் முகமது பரிதாபமாக உயிரிழந்து விட்டார். இதுகுறித்து தகவல் அறிந்த காவல்துறையினர் சம்பவ இடத்திற்கு விரைந்து சென்று இஜாஸ் முகமதின் உடலை கைப்பற்றி உடற்கூறு ஆய்வுக்காக அரசு மருத்துவமனைக்கு அனுப்பி வைத்துள்ளனர். மேலும் இச்சம்பவம் குறித்து வழக்குப்பதிவு செய்த காவல்துறையினர் விபத்தை ஏற்படுத்திய கார் டிரைவரான பொன்ராஜ் சுரேசை கைது செய்து தீவிர விசாரணை நடத்தி வருகின்றனர்.