புதிதாக திறக்கப்பட்ட டாஸ்மாக் கடைக்கு எதிர்ப்பு தெரிவித்து பெண்கள் சாலை மறியலில் ஈடுபட்ட சம்பவம் பரபரப்பை ஏற்படுத்தியுள்ளது.
கிருஷ்ணகிரி மாவட்டத்தில் உள்ள குன்னத்தூர் கிராமத்தில் புதிதாக அரசு டாஸ்மாக் மதுக்கடை திறக்கப்பட்டதற்கு எதிர்ப்பு தெரிவித்து அப்பகுதியில் வசிக்கும் பெண்கள் சாலை மறியலில் ஈடுபட்டுள்ளனர். இதுகுறித்து தகவலறிந்த ஊத்தங்கரை போலீசார் மற்றும் கல்லாவி போலீசார் சம்பவ இடத்திற்கு விரைந்து சென்று மறியலில் ஈடுபட்டவர்களுடன் பேச்சுவார்த்தையில் ஈடுபட்டுள்ளனர்.
அப்போது அந்த பெண்கள் கண்ணீர் விட்டபடி அத்தியாவசிய பொருட்கள் வாங்குவதற்காக எங்கள் பகுதியில் வசிக்கும் மக்கள் குன்னத்தூருக்கு தான் செல்வார்கள் எனவும், இப்போது அந்த சாலையில் டாஸ்மாக் கடை திறக்கப்பட்டுள்ளதால் ஊருக்கு சென்று வர இயலாத நிலைமை ஏற்பட்டுள்ளது எனவும் கூறியுள்ளனர். எனவே புதிதாக திறக்கப்பட்ட இந்த மதுக்கடையை மூட வேண்டும் என அவர்கள் வலியுறுத்தினர். அதற்கு போலீசார் சம்பந்தப்பட்ட அதிகாரிகளிடம் பேசி உரிய நடவடிக்கை எடுக்கப்படுவதாகவும், இந்த மது கடை தற்காலிகமாக மூடப்படுவதாகவும் தெரிவித்ததால் போராட்டத்தில் ஈடுபட்ட பெண்கள் அங்கிருந்து கலைந்து சென்றுவிட்டனர்.