பிரபல ரவுடி கழுத்தறுத்துக் கொலை… அடுத்தடுத்து கொலையால் அதிர்ச்சி..!!

பெரம்பலூர் மாவட்டம் திருநகரைச் சேர்ந்தவர் கிருஷ்ணமூர்த்தி.. இவருடைய 27 வயது மகன் வீரமணி நாள்தோறும் காய்கறிச்சந்தையில் கூலித் தொழிலாளியாக வேலை செய்து வந்துள்ளார். இவர் மீது கொலை, வழிப்பறி உட்பட பல்வேறு வழக்குகள் நிலுவையில் உள்ளன.

இந்தநிலையில் நேற்று இரவு (ஜூன் 7) வீட்டில் இருந்த வீரமணியை சிலர் வெளியே அழைத்துச் சென்றுள்ளனர். பின்னர் வெகு நேரமாகியும் வீரமணி வீட்டுக்கு திரும்பாததால் அவரது பெற்றோர் அவரைத் தேடி வெளியே சென்றனர். அப்போது, அவர்களுக்கு பெரும் அதிர்ச்சி காத்திருந்தது. அதாவது, வீட்டின் அருகில் வீரமணி கழுத்தறுக்கப்பட்டு படுகொலை செய்யப்பட்டு ரத்த வெள்ளத்தில் கிடந்தார். அதனை பார்த்த பெற்றோர் கதறி அழுதனர்.

இதையடுத்து தகவலறிந்து சம்பவ இடத்திற்கு விரைந்து வந்த போலீசார் வீரமணியின் உடலைக் கைப்பற்றி பிரேத பரிசோதனைக்காக பெரம்பலூர் அரசு மருத்துவமனைக்கு அனுப்பிவைத்தனர்.

இந்த சம்பவம் குறித்து அளிக்கப்பட்ட புகாரின்பேரில் பெரம்பலூர் போலீசார் வழக்குப்பதிவு செய்து வீரமணியைக் கொலைசெய்தவர்கள் யார்?, எதற்காக அவர் கொலைசெய்யப்பட்டார்? என பல்வேறு கோணங்களில் தீவிர விசாரணை நடத்தி வருகின்றனர். பெரம்பலூரில் அடுத்தடுத்து தொடர் கொலைச் சம்பவம் நடப்பதால் பொதுமக்கள் அச்சத்தில் உறைந்து போயுள்ளனர்.