மாநில அளவில் நடைபெற்ற செஸ் போட்டியில் 250 மாணவ-மாணவிகள் கலந்து கொண்டு தங்களது திறமைகளை வெளிப்படுத்தினர்.
ஈரோடு மாவட்டத்திலுள்ள கொங்கு கல்வி நிலைய பள்ளிக்கூட வளாகத்தில் சதுரங்க சர்க்கிளின் சார்பாக மாநில அளவில் செஸ் போட்டியானது நடைபெற்றது. இந்த நிகழ்ச்சிக்கு சதுரங்க சரக்கிள் செயலாளரான ரமேஷ் தலைமை தாங்கினார். அப்போது கொங்கு கல்வி நிலைய பள்ளிக்கூட தாளாளர் செல்வராஜ் சிறப்பு அழைப்பாளராக பங்கேற்று போட்டிகளை தொடங்கி வைத்தார். இதில் 9, 13, 17 வயதிற்கு உட்பட்டோர் மற்றும் பொதுப்பிரிவுகளில் போட்டிகள் நடத்தப்பட்டது. இந்த போட்டிகளில் ஈரோடு, நாமக்கல், திண்டுக்கல், கரூர், கோவை, சேலம், மதுரை, திருநெல்வேலி, தூத்துக்குடி, கன்னியாகுமரி உள்ளிட்ட பல்வேறு மாவட்டங்களை சேர்ந்த 200-க்கும் மேற்பட்ட மாணவ-மாணவிகள் பங்கேற்று தங்களது திறமைகளை வெளிப்படுத்தினர்.
இதனையடுத்து வெற்றி பெற்ற மாணவ-மாணவிகளுக்கு பரிசளிப்பு விழா நடைபெற்றது. அந்த விழாவில் தொழிலதிபர்கள் இளங்கோ, சுந்தர்ராஜ், அகில உலக ஜோதிட சங்க தலைவர் ஓம் உலகநாதன், பாரதியார் பல்கலைக்கழக ஆட்சிமன்றக்குழு உறுப்பினர் ரூபா குணசீலன் ஆகியோர் கலந்துகொண்டு வெற்றி பெற்ற மாணவ-மாணவிகளுக்கு கோப்பை மற்றும் சான்றிதழை வழங்கினார்கள். மேலும் விழாவில் தாலுகா செஸ் அசோசியேசன் செயலாளர் கராத்தே நாவலன் மற்றும் மாணவ-மாணவிகளின் பெற்றோர்கள் கலந்து கொண்டனர்.