தந்தையும், சகோதரிகளும் சொத்தை தர மறுத்ததால் வாலிபர் விஷம் குடித்து தற்கொலை செய்து கொண்ட சம்பவம் சோகத்தை ஏற்படுத்தியுள்ளது.
தூத்துக்குடி மாவட்டத்திலுள்ள மரந்தலை மணல்மேடு பகுதியில் கூலித் தொழிலாளியான கோபாலகிருஷ்ணன் என்பவர் தனது குடும்பத்துடன் வசித்து வருகின்றார். இவருக்கு தங்கலட்சுமி என்ற மனைவி உள்ளார். இந்த தம்பதிகளுக்கு பட்டு லிங்கம் என்ற மகனும் 2 மகள்களும் இருக்கின்றனர். இவர்களில் பட்டு லிங்கத்திற்கு திருமணமாகி நந்தினி என்ற மனைவி இருக்கின்றார். இவர் தனது மனைவியுடன் கோவையில் வசித்து அங்கு கூலி வேலை செய்து வந்துள்ளார். அங்கு பட்டு லிங்கம் தனது குடும்பத்தை பராமரிப்பதற்காக அதிக கடன்களை வாங்கி அதனை திரும்ப செலுத்த முடியாமல் மிகவும் சிரமப்பட்டு வந்துள்ளார். இதனால் பட்டுலிங்கம் தனது கடனை அடைப்பதற்காக சொந்த ஊரில் உள்ள நிலத்தை விற்று அதில் வரும் பணத்தை கொண்டு கடனை செலுத்தி விடலாம் என்று நினைத்து சொந்த ஊருக்கு குடும்பத்துடன் சென்று உள்ளார்.
இந்நிலையில் பட்டு லிங்கம் தனது பெற்றோர் மற்றும் சகோதரிகளிடம் சொத்தில் தனக்கு சேர வேண்டிய பங்கை பிரித்து தர வேண்டும் என்று கேட்டுள்ளார். அதற்கு பட்டு லிங்கத்தின் பெற்றோர் மற்றும் சகோதரிகள் மறுப்பு தெரிவித்து அவரிடம் தகராறு செய்துள்ளனர். இதனால் பட்டு லிங்கம் மிகுந்த மனவேதனையுடன் இருந்துள்ளார். இந்நிலையில் பட்டு லிங்கம் வீட்டில் யாரும் இல்லாத சமயத்தில் விஷம் குடித்துவிட்டு மயங்கிக் கீழே விழுந்து கிடந்துள்ளார். இதனையடுத்து வெளியே சென்று விட்டு வீட்டிற்குத் திரும்பிய அவரின் மனைவியான நந்தினி தனது கணவர் வாயில் நுரை வந்த நிலையில் மயங்கி கீழே கிடப்பதைக் கண்டு அதிர்ச்சி அடைந்து அலறி சத்தம் போட்டுள்ளார். அந்த அலறல் சத்தத்தை கேட்டு அருகில் இருந்தவர்கள் விரைந்து சென்று பார்த்து அவரை உடனடியாக மீட்டு சிகிச்சைக்காக அரசு மருத்துவமனைக்கு கொண்டு சென்றனர்.
ஆனால் அங்கு பட்டுலிங்கத்தை பரிசோதித்த மருத்துவர்கள் அவர் ஏற்கனவே உயிரிழந்து விட்டார் என்று தெரிவித்துள்ளனர். இதுகுறித்து தகவல் அறிந்த காவல்துறையினர் மருத்துவமனைக்கு விரைந்து சென்றுபட்டு லிங்கத்தின் உடலை கைப்பற்றி உடற்கூறு ஆய்வுக்காக அனுப்பி வைத்துள்ளனர். இதனையடுத்து பட்டு லிங்கத்தின் மனைவியான நந்தினி காவல் நிலையத்தில் புகார் கொடுத்துள்ளார். அந்தத் தகவலின்படி வழக்குப்பதிவு செய்த காவல்துறையினர் பட்டு லிங்கத்தை தற்கொலைக்கு தூண்டிய குற்றத்திற்காக கோபாலகிருஷ்ணன் உட்பட 6 பேரை கைது செய்து தீவிர விசாரணை நடத்தி வருகின்றனர்.