சட்டவிரோதமாக மோட்டார்சைக்கிளில் கஞ்சா கடத்த முயன்ற 2 பேரை காவல்துறையினர் கைது செய்தனர்.
விருதுநகர் மாவட்டத்திலுள்ள சாத்தூர் தேசிய நெடுஞ்சாலையில் வெங்கடாசலபுரம் அருகில் உள்ள சோதனைச்சாவடியில் டவுன் போலீஸ் சப்-இன்ஸ்பெக்டர் சசிகுமார் தீவிர வாகனச் சோதனையில் ஈடுபட்டு இருந்தார். அப்போது அவ்வழியாக வந்த இருசக்கர வாகனங்களை அவர் நிறுத்தி சோதனை செய்தபோது பையில் கஞ்சா இருப்பது தெரியவந்தது.
இதனையடுத்து இருசக்கர வாகனத்தில் வந்த 2 பேரிடம் டவுன் காவல்துறையினர் விசாரணை மேற்கொண்டனர். அந்த விசாரணையில் அவர்கள் தூத்துக்குடி மாவட்டம் நாலாட்டின்புதூரை சேர்ந்த இசக்கிராஜ், தாமோதர கண்ணன் என்பது காவல்துறையினருக்கு தெரியவந்தது. அதன்பின் அவர்களிடம் இருந்த 2 கிலோ கஞ்சாவை காவல்துறையினர் பறிமுதல் செய்ததோடு 2 பேரையும் கைது செய்தனர்