வார சந்தைக்கு அனுமதி வழங்கக் கோரி வியாபாரிகள் காய்கறிகளுடன் தர்ணா போராட்டத்தில் ஈடுபட்டுள்ளனர்.
தர்மபுரி மாவட்டத்தில் உள்ள நல்லம்பள்ளியில் வாரந்தோறும் செவ்வாய்க் கிழமை நாட்களில் வாரசந்தை நடைபெறுவது வழக்கமாக இருந்து வருகிறது. இந்நிலையில் கொரோனா பரவலை தடுக்கும் விதமாக இந்த வார சந்தைக்கு அரசு அனுமதி அளிக்கவில்லை. இருப்பினும் தற்போது வார சந்தை போடப்பட்டுள்ளது. இதனை அடுத்து வியாபாரிகள் காய்கறிகளை விற்பனை செய்வதற்காக கொண்டு வந்துள்ளனர். இது பற்றி தகவல் அறிந்த அதிகாரிகள் விரைந்து சென்று வாரசந்தை போடக் கூடாது என கூறியுள்ளனர். அதன் பின் வியாபாரிகளை அங்கிருந்து கலைந்து செல்லுமாறு அதிகாரிகள் தெரிவித்துள்ளனர்.
இதனால் கோபமடைந்த வியாபாரிகள் சந்தை செயல்பட முறையாக அனுமதி வழங்கக் கோரி காய்கறிகளுடன் தர்ணா போராட்டத்தில் ஈடுபட்டுள்ளனர். இதனை தொடர்ந்து ஊராட்சி மன்ற தலைவர் புவனேஸ்வரி சந்தைக்கு நேரடியாக சென்று தர்ணாவில் ஈடுபட்ட வியாபாரியிடம் பேச்சுவார்த்தையில் ஈடுபட்டுள்ளார். இது பற்றி மாவட்ட நிர்வாகத்தின் கவனத்திற்கு கொண்டு சென்று உரிய நடவடிக்கை எடுப்பதாக ஊராட்சி மன்ற தலைவர் புவனேஸ்வரி உறுதியளித்துள்ளார். அதன் பிறகு அவர்கள் போராட்டத்தை கைவிட்டு அங்கிருந்து கலைந்து சென்றுள்ளனர்.