மின்சார பாய்ந்து 4 மாடுகள் உயிரிழந்த சம்பவம் பரபரப்பை ஏற்படுத்தியுள்ளது.
திருப்பூர் மாவட்டத்திலுள்ள மேட்டுப்பாளையம் பகுதியில் விசாலாட்சி என்பவர் வசித்து வருகிறார். இவர் சொந்தமாக 25 மாடுகளை வளர்த்து வருகிறார். இந்நிலையில் மாடு மேய்க்கும் நபர் வழக்கம்போல் மாடுகளை அப்பகுதியில் உள்ள காடுகளுக்கு ஓட்டிச் சென்றுள்ளார். இதனையடுத்து மாடுகள் அங்குள்ள தரிசு நிலங்களில் உள்ள புற்களை மேய்ந்து கொண்டிருந்தன. அதன்பின் மாடு மேய்க்கும் நபர் மாடுகளை மாட்டுப்பட்டிக்குன் அழைத்து சென்றுள்ளார்.
இந்நிலையில் அங்கிருந்த மின்கம்பி அறுந்து தோட்டத்தில் போடப்பட்டிருந்த கம்பி வேலியில் விழுந்துள்ளது. இதனால் மின்சாரம் கம்பி வேலியில் பாய்ந்து அங்கு மேய்ந்து கொண்டிருந்த மாடுகள் மீது மின்சாரம் பாய்ந்தது. இதில் 4 மாடுகள் சம்பவ இடத்திலேயே உயிரிழந்தன. இதுகுறித்து தகவல் அறிந்த வருவாய்த்துறையினர் மற்றும் கால்நடைத்துறையினர் சம்பவ இடத்திற்கு விரைந்து சென்று இறந்துபோன மாடுகளை பரிசோதனை செய்து தோட்டத்திலேயே குழி தோண்டி புதைத்தனர். இறந்த மாடுகளின் மதிப்பு ரூ.2 லட்சத்து 50 ஆயிரம் இருக்கும். மேலும் இதுகுறித்து மின்வாரிய அதிகாரிகள் நேரில் சென்று ஆய்வு செய்தனர்.