மூதாட்டியை அரிவாளால் தாக்கி கொலை மிரட்டல் விடுத்தவரை காவல்துறையினர் கைது செய்துள்ளனர்.
திருப்பூர் மாவட்டத்தில் உள்ள தாராபுரம் உட்கோட்டம் மூலனூர் காவல் நிலையத்திற்கு உட்பட்ட எம்.கொல்லப்பட்டியில் சுப்பிரமணியம்-நல்லாத்தாள் தம்பதிக்கும் பக்கத்து தோட்டத்தில் வசிக்கும் சுப்பிரமணி குடும்பத்தினருக்கும் ஏற்கனவே கிணற்றில் நீர் பாய்ச்சுவது தொடர்பாக முன்விரோதம் இருந்து வந்துள்ளது. இந்நிலையில் நல்லாத்தாள் வழக்கம் போல் தோட்டத்திற்கு நடந்து சென்று கொண்டிருந்தார். அப்போது பக்கத்து தோட்டத்தில் இருந்த சுப்பிரமணி நல்லாத்தாளிடம் வந்து ‘உன்னால் தான் இந்த கிணற்று பிரச்சனை ஏற்பட்டது, உன்னைக் கொல்லாமல் விட மாட்டேன்’ என அரிவாளால் வெட்டி தாக்கியுள்ளார்.
மேலும் சுப்பிரமணி மனைவி திருப்பதி மற்றும் மகன் சக்திவேல் ஆகியோர் கையால் தாக்கி கொலை மிரட்டல் விடுத்துள்ளனர். இதனையடுத்து காயமடைந்த நல்லாத்தாள் அக்கம்பக்கதினரின் உதவியுடன் தாராபுரம் அரசு மருத்துவமனையில் அனுமதிக்கப்பட்டு சிகிச்சை பெற்றுள்ளார். இதுகுறித்து நல்லாத்தாள் மூலனூர் காவல்நிலையத்தில் புகார் அளித்துள்ளார். அந்த புகாரின் பேரில் வழக்கு பதிவு செய்த காவல்துறையினர் சுப்பிரமணியனை கைது செய்து விசாரணை மேற்கொண்டு வருகின்றனர்.