மோட்டார் சைக்கிள் மீது லாரி மோதியதில் பெண் ஒருவர் உயிரிழந்த சம்பவம் சோகத்தை ஏற்படுத்தியுள்ளது.
பெரம்பலூர் மாவட்டத்தில் ஈச்சம்பட்டி நடுத்தெருவில் திருப்பதி என்பவர் வசித்து வருகிறார். இவருக்கு செல்வகுமாரி என்ற மகள் இருந்துள்ளார். இவர் இம்மாவட்டத்தில் உள்ள தனியார் நர்சிங் கல்லூரியில் முதலாம் ஆண்டு படித்து வந்துள்ளார். இந்நிலையில் தற்போது அனைத்து கல்லூரிகளும் திறக்கப்பட்டுள்ளது. இதனால் கல்லூரி செல்வதற்கு முன்பாக கொரோனா பரிசோதனை செய்ய அரசு மருத்துவமனைக்கு செல்வகுமாரி தனது அண்ணன் கார்த்திக்குடன் மோட்டார் சைக்கிளில் வந்து கொண்டிருக்கும் போது பின்புறம் வந்த சிமெண்ட் லாரி மோட்டார் சைக்கிள் மீது மோதியுள்ளது.
இதில் படுகாயம் அடைந்த செல்வகுமாரி சம்பவ இடத்திலேயே பரிதாபமாக உயிரிழந்துள்ளார். பின்னர் காயங்களுடன் உயிர் தப்பிய கார்த்திக்கை அருகில் இருந்தவர்கள் மீட்டு சிகிச்சைக்காக அரசு மருத்துவமனைக்கு அனுப்பி வைத்துள்ளனர். இது தொடர்பாக தகவல் அறிந்த காவல்துறையினர் சம்பவ இடத்திற்கு விரைந்து சென்று செல்வகுமாரின் உடலை மீட்டு பிரேத பரிசோதனைக்காக அரசு மருத்துவமனைக்கு அனுப்பி வைத்துள்ளனர். மேலும் இது குறித்து வழக்கு பதிவு செய்த காவல்துறையினர் லாரியை ஓட்டி வந்த ஓட்டுநர் அழகேசனை கைது செய்து தீவிர விசாரணை மேற்கொண்டு வருகின்றனர்.