மோட்டார் சைக்கிளில் இருந்து தவறி விழுந்து கல்லூரி மாணவர் உயிரிழந்த சம்பவம் சோகத்தை ஏற்படுத்தியுள்ளது.
கேரள மாநிலம் கொல்லத்தில் அபி பிரசாந்த் என்பவர் வசித்து வந்தார். இவரும் அதே பகுதியை சேர்ந்த ஏவின்தாமஸ் என்பவரும் சேலம் மாவட்டம் ஏற்காட்டில் உள்ள தனியார் கேட்டரிங் கல்லூரியில் பி.எஸ்.சி. பட்டப்படிப்பு பயின்று வந்தனர். இதனால் மாணவர்கள் இருவரும் கல்லூரி வளாகத்தில் உள்ள விடுதியில் தங்கி படித்தனர். இந்நிலையில் கல்லூரி அருகே உள்ள துரித உணவக கடையின் உரிமையாளரிடம் இருந்து மாணவர்கள் இருவரும் மோட்டார் சைக்கிளை வாங்கி கொண்டு சேலத்துக்கு புறப்பட்டு வந்தனர். அப்போது மோட்டார் சைக்கிளை பிரசாந்த் ஓட்டி வந்த நிலையில் ஏவின்தாமஸ் பின் இருக்கையில் அமர்ந்திருந்தார்.
இதனையடுத்து 20-வது கொண்டை ஊசி வளைவு பகுதியில் மாணவர்கள் மோட்டார் சைக்கிளில் வந்தனர். அப்போது அங்கு மேகமூட்டம் அதிகமாக காணப்பட்டதால் சாலை சரியாக தெரியாமல் மோட்டார் சைக்கிள் ரோட்டோரம் உள்ள பாறையின் மீது மோதி மாணவர்கள் இருவரும் தவறி கீழே விழுந்தனர். இதில் வண்டியின் பின்னால் அமர்ந்திருந்த ஏவின்தாமசுக்கு லேசான காயம் ஏற்பட்டது. மேலும் இந்த விபத்தில் அபி பிரசாந்த் பலத்த காயத்துடன் உயிருக்கு போராடிக் கொண்டிருந்தார். இந்நிலையில் அவ்வழியாக வந்த ஒரு காரின் டிரைவர் உடனடியாக ஆம்புலன்சுக்கு தகவல் கொடுத்தார்.
அந்த தகவலின்படி அங்கு வந்த ஆம்புலன்ஸ் மூலம் மாணவர்கள் இருவரும் ஓமலூர் அரசு மருத்துவமனைக்கு கொண்டு செல்லப்பட்டனர். அங்கு சிகிச்சை பலனின்றி அபி பிரசாந்த் பரிதாபமாக உயிரிழந்து விட்டார். இதுகுறித்து தகவலறிந்த காவல்துறையினர் சம்பவ இடத்திற்கு விரைந்து சென்று மாணவன் அபி பிரசாந்தின் சடலத்தை கைப்பற்றி பிரேத பரிசோதனைக்காக சேலம் அரசு மருத்துவமனைக்கு அனுப்பி வைத்தனர். மேலும் இதுகுறித்து காவல்துறையினர் வழக்குப்பதிவு செய்து விசாரணை மேற்கொண்டு வருகின்றனர்.