மோட்டார் சைக்கிள் மீது லாரி மோதிய விபத்தில் தந்தை பலியான நிலையில், மகள் மருத்துவமனையில் அனுமதிக்கப்பட்டுள்ள சம்பவம் பரபரப்பை ஏற்படுத்தியுள்ளது.
விழுப்புரம் மாவட்டத்தில் உள்ள உளுந்தூர்பேட்டை பகுதியில் பச்சமுத்து என்ற கூலித்தொழிலாளி வசித்து வருகிறார். இந்நிலையில் பச்சைமுத்து தனது மகள் தமிழரசி என்பவருடன் மோட்டார் சைக்கிளில் சென்னை நோக்கி புறப்பட்டுள்ளார். இதனையடுத்து பிடாகம் என்ற இடத்தில் சென்று கொண்டிருக்கும் போது பச்சமுத்துவின் மோட்டார் சைக்கிள் மீது பெட்ரோல் பங்கிலிருந்து வெளியே வந்த லாரி பலமாக மோதி விட்டது.
இந்த விபத்தில் படுகாயமடைந்த பச்சைமுத்து சம்பவ இடத்திலேயே பரிதாபமாக உயிரிழந்து விட்டார். அதன்பின் அருகிலிருந்தவர்கள் தமிழரசியை மீட்டு முண்டியம்பாக்கம் அரசு மருத்துவமனையில் சிகிச்சைக்காக அனுமதித்துள்ளனர். மேலும் இச்சம்பவம் குறித்து வழக்குப்பதிவு செய்த காவல்துறையினர் லாரி டிரைவரான மணிகண்டன் என்பவரை கைது செய்து விசாரணை நடத்தி வருகின்றனர்.