லாரியும் மோட்டார் சைக்கிளும் மோதிய விபத்தில் 12 – ஆம் வகுப்பு படித்த மாணவன் உயிரிழந்த சம்பவம் சோகத்தை ஏற்படுத்தியுள்ளது.
ஈரோடு மாவட்டத்திலுள்ள துருசனாம்பாளையம் பகுதியில் சின்னப்பி என்பவர் வசித்து வருகிறார். இவருக்கு சரோஜா என்ற மனைவி உள்ளார். இந்த தம்பதிக்கு 12 – ஆம் வகுப்பு படித்து முடித்த சித்தேஸ்வரன் என்ற மகன் இருந்துள்ளார். இந்நிலையில் சித்தேஸ்வரன் மோட்டார் சைக்கிளில் துருசனாம்பாளையத்திலிருந்து ஊசிமலை பகுதிக்கு சென்று கொண்டிருந்தார். இதனையடுத்து துருசனாம்பாளையம் பேருந்து நிலையம் அருகே சென்று கொண்டிருந்தபோது சித்தேஸ்வரனின் மோட்டார் சைக்கிளும் அந்த வழியாக வந்த லாரியும் எதிர்பாராதவிதமாக ஒன்றுக்கொன்று மோதின.
இந்த விபத்தில் சித்தேஸ்வரன் பலத்த காயம் அடைந்தார். இதனைப்பார்த்த அருகிலுள்ளவர்கள் பலத்த காயமடைந்த சித்தேஸ்வரனை உடனடியாக மீட்டு அந்தியூர் அரசு மருத்துவமனைக்கு சிகிச்சைக்காக கொண்டு சென்றனர். ஆனால் போகும் வழியிலேயே சித்தேஸ்வரன் பரிதாபமாக உயிரிழந்து விட்டார். இதனைப்பார்த்த சித்தேஸ்வரனின் பெற்றோர் மற்றும் உறவினர்கள் கதறி அழுதனர். இதுபற்றி தகவலறிந்த காவல்துறையினர் சம்பவ இடத்திற்கு விரைந்து சென்று சித்தேஸ்வரனின் சடலத்தை கைப்பற்றி அந்தியூர் அரசு மருத்துவமனைக்கு பிரேத பரிசோதனைக்காக அனுப்பி வைத்தனர். மேலும் இதுகுறித்து வழக்கு பதிவு செய்த பர்கூர் காவல்துறையினர் விசாரணை மேற்கொண்டு வருகின்றனர்.