இரண்டு மோட்டார் சைக்கிள் ஒன்றுக்கொன்று மோதிய விபத்தில் கூலித் தொழிலாளி உயிரிழந்த சம்பவம் சோகத்தை ஏற்படுத்தியுள்ளது.
தர்மபுரி மாவட்டத்திலுள்ள கீரைப்பட்டி பகுதியில் அஜித்குமார் என்பவர் வசித்து வந்துள்ளார். இவர் விவசாயம் செய்து வருகிறார். இவருக்கு சுவாதி என்ற மனைவி உள்ளார். இந்த தம்பதியினருக்கு இரண்டு வயதில் மகளும், ஒரு மாத ஆண் குழந்தையும் உள்ளது. இந்நிலையில் சேலம் மாவட்டத்தில் உள்ள வாழப்பாடி பகுதியில் வசிக்கும் மாமனார் வீட்டிற்கு பிரசவத்திற்காக சென்ற தனது மனைவியையும் குழந்தையையும் பார்ப்பதற்காக அஜித்குமார் சென்றுள்ளார்.
இந்நிலையில் அங்கிருந்து அஜித்குமார் தனது உறவினருக்கு பெண் பார்க்க புழுதிகுட்டை பகுதிக்கு சென்று விட்டு மோட்டார் சைக்கிளில் அவரது உறவினரான அழகேசன் என்பவருடன் ஊர் திரும்பியுள்ளார். அப்போது இருவரும் சந்து மலை பிரிவு சாலை பகுதியில் சென்று கொண்டிருந்த போது எதிரே வந்த மோட்டார் சைக்கிளும் அஜித்குமார் வந்த மோட்டார் சைக்கிளும் எதிர்பாராதவிதமாக ஒன்றுகொன்று மோதி விபத்துக்குள்ளானது.
இதனால் பலத்த காயம் அடைந்த அஜித்குமார் சம்பவ இடத்திலேயே பரிதாபமாக உயிரிழந்தார். மேலும் மற்ற மோட்டார் சைக்கிளில் வந்த இரண்டு நபர்களும் மற்றும் அழகேசன் ஆகியோரை அருகில் உள்ளவர்கள் மீட்டு சேலம் மருத்துவமனைக்கு சிகிச்சைக்காக அனுமதித்தனர். இதுகுறித்து தகவலறிந்த காவல்துறையினர் சம்பவ இடத்திற்கு விரைந்து சென்று அஜித்குமாரின் உடலை மீட்டு சேலம் அரசு மருத்துவமனையில் பிரேத பரிசோதனைக்காக அனுப்பி வைத்தனர். மேலும் இச்சம்பவம் குறித்து வழக்கு பதிவு செய்த காவல்துறையினர் விசாரணை நடத்தி வருகின்றனர்.