மோட்டார் சைக்கிள் விபத்தில் டிரைவர் உயிரிழந்த சம்பவம் சோகத்தை ஏற்படுத்தியுள்ளது.
தூத்துக்குடி மாவட்டத்திலுள்ள இளையரசனேந்தல் பகுதியில் இருளாண்டி என்பவர் வசித்து வருகிறார். இவருக்கு நவநீதகிருஷ்ணன் என்ற மகன் இருந்துள்ளார். இவர் லாரி டிரைவராக வேலை பார்த்து வந்துள்ளார். இந்நிலையில் நவநீதகிருஷ்ணன் மோட்டார் சைக்கிளில் கோவில்பட்டியிலிருந்து இளையரசனேந்தலுக்கு சென்று கொண்டிருந்தார். அப்போது பெட்ரோல் பங்க் அருகில் நடந்து கொண்டிருந்த போது வெங்கடாசலபுரம் பகுதியில் வசிக்கும் மோகன் ராஜ் என்பவர் மீது மோட்டார் சைக்கிள் மோதி விபத்துக்குள்ளானது.
இந்த விபத்தில் மோட்டார் சைக்கிளில் இருந்து தூக்கி வீசப்பட்டு பலத்த காயமடைந்த நவநீதகிருஷ்ணன் சம்பவ இடத்திலேயே பரிதாபமாக உயிரிழந்தார். இது குறித்து தகவலறிந்த காவல்துறையினர் சம்பவ இடத்திற்கு விரைந்து சென்று நவநீதகிருஷ்ணனை மீட்டு கோவில்பட்டி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். இதனையடுத்து காயமடைந்த மோகன் ராஜை மீட்டு கோவில்பட்டி அரசு மருத்துவமனையில் சிகிச்சைக்காக அனுமதித்தனர். அங்கு அவருக்கு சிகிச்சை அளிக்கப்பட்டு வருகிறது. மேலும் இது குறித்து வழக்கு பதிவு செய்த கோவில்பட்டி காவல்துறையினர் விசாரணை மேற்கொண்டு வருகின்றனர்.