2 மோட்டார் சைக்கிள்கள் ஒன்றுக்கொன்று மோதிய விபத்தில் பனியன் நிறுவனத் தொழிலாளி உயிரிழந்த சம்பவம் சோகத்தை ஏற்படுத்தியுள்ளது.
திருப்பூர் மாவட்டத்தில் உள்ள சத்யா நகர் பகுதியில் சாதிக் அலி என்பவர் வசித்து வந்துள்ளார். இவர் பனியன் நிறுவனத்தில் தொழிலாளியாக வேலை பார்த்து வந்துள்ளார். இந்நிலையில் சாதிக் அலி தனது மனைவி சமீனா பானு, மகள் சஹானா, மகள் சாஹித் ஆகியோருடன் வெங்கடேஸ்வரா நகர் சாலையில் மோட்டார் சைக்கிளில் சென்று கொண்டிருந்தார். அப்போது எதிரே மோட்டார்சைக்கிளில் மதுரை மேலூர் பகுதியில் வசிக்கும் அருண்குமார் உள்ளிட்ட 3 பேர் சென்று கொண்டிருந்தனர்.
அப்போது எதிர்பாராதவிதமாக 2 மோட்டார் சைக்கிளும் ஒன்றுக்கொன்று பயங்கரமாக மோதியது. இதில் அனைவரும் தூக்கி வீசப்பட்டு பலத்த காயமடைந்தனர். இந்த விபத்தில் சாதிக் அலி, சஹானா, சமீனா பானு, சாஹித், அருண் குமார் ஆகியோரை அருகிலிருந்தவர்கள் உடனடியாக மீட்டு திருப்பூர் அரசு மருத்துவமனைக்கு சிகிச்சைக்காக அனுப்பி வைத்தனர். இதனையடுத்து சாதிக் அலியை மேல் சிகிச்சைக்காக கோவை அரசு மருத்துவமனைக்கு அனுப்பி வைத்தனர். ஆனால் அங்கு அளிக்கப்பட்ட சிகிச்சை பலனின்றி சாதிக் அலி பரிதாபமாக உயிரிழந்தார். மேலும் இது குறித்து வழக்கு பதிவு செய்த காவல்துறையினர் விசாரணை நடத்தி வருகின்றனர்.