இந்தியா- இங்கிலாந்து டெஸ்ட் கிரிக்கெட் போட்டியில் இங்கிலாந்து அணியின் மோயீன் அலி இந்திய அணி வீரர்களுக்கு மிகப்பெரிய சவாலாக இருப்பார் என்று இங்கிலாந்து கிரிக்கெட் அணியின் முன்னாள் சுழற்பந்து வீச்சாளர் மான்டி பனேசர் கூறியுள்ளார்.
சென்னை சேப்பாக்கம் கிரிக்கெட் மைதானத்தில் வருகிற பிப்ரவரி 5ஆம் தேதி இந்தியா- இங்கிலாந்துக்கு இடையேயான முதலாவது டெஸ்ட் கிரிக்கெட் போட்டி நடைபெற உள்ளது. இந்த போட்டியில் வெற்றி பெறுவதற்காக இரண்டு அணிகளின் வீரர்களும் கடுமையாக பயிற்சி செய்து வருகின்றனர். இந்நிலையில் இந்த கிரிக்கெட் தொடரில் இங்கிலாந்து அணியின் ஆல்ரவுண்டராக திகழும் மோயீன் அலி இந்திய கிரிக்கெட் அணியின் பேட்ஸ்மேன்களுக்கு மிகப்பெரிய பெரிய சவாலாக இருப்பார் என்று இங்கிலாந்து கிரிக்கெட் அணியின் முன்னாள் சுழற்பந்து வீச்சாளர் மான்டி பனேசர் கூறியுள்ளார்.
இதுகுறித்து அவர் கூறியதாவது, “இந்திய கிரிக்கெட் அணியில் அதிகமான வலது கை பேட்ஸ்மேன்கள் உள்ளனர். எனவே அவர்களை சமாளிக்க இங்கிலாந்து அணியின் தரப்பில் ஜாக் லீச் விளையாடுவதற்கு வாய்ப்புகள் அதிகம் உள்ளது. அதேபோல் ஆல்ரவுண்டர் மோயீன் அலி இந்த கிரிக்கெட் போட்டியில் கண்டிப்பாக ஒரு பெரிய தாக்கத்தை ஏற்படுத்துவார் என்று எனக்கு தோன்றுகிறது.
மேலும் இந்திய அணி வீரர்களுக்கு அவர் ஒரு மிகப்பெரிய சவாலாக இருப்பார். இங்கிலாந்து அணியின் சுழற்பந்து வீச்சாளர்கள் “டியூக்ஸ்” பந்துகளில் சிறப்பாக விளையாடுவார்கள். ஆனால் “SG ” பந்துகளில் விளையாடப்படும் இந்த டெஸ்ட் போட்டி எப்படி இருக்கும் என்பதை எதிர்பார்த்து நான் காத்துக் கொண்டிருக்கிறேன்” என்று கூறியுள்ளார்.