முதியவர் வெட்டி கொலை செய்யப்பட்ட சம்பவம் பரபரப்பை ஏற்படுத்தியுள்ளது.
தூத்துக்குடி மாவட்டத்திலுள்ள உடையடியூர் பகுதியில் நாகபத்திரன் என்பவர் வசித்து வருகிறார். இவருக்கு சொந்தமான மாடுகளை காணவில்லை. இதனை தேடிய போது நாகபத்திரனுக்கு சாயர்புரம் அருகிலுள்ள நட்டாத்தி-மீனாட்சிபட்டி சாலையில் மாடுகள் மேய்ந்து கொண்டிருந்தது தெரியவந்தது. இதனை தொடர்ந்து நாகபத்திரன் மாடுகளை அழைத்து வருவதற்காக சைக்கிளில் சென்றுள்ளார். அதன் பின் நீண்ட நேரமாகியும் அவர் வீட்டிற்கு திரும்பவில்லை. இந்நிலையில் மீனாட்சிபட்டி சாலையோரத்தில் நாகபத்திரன் ரத்த வெள்ளத்தில் இறந்து கிடந்துள்ளார்.
இதுகுறித்து தகவலறிந்த சாயர்புரம் காவல்துறையினர் சம்பவ இடத்திற்கு விரைந்து சென்று விசாரணை நடத்தினர். அப்போது நாகபத்திரனின் கழுத்தில் வெட்டு காயங்கள் இருந்தன. எனவே மர்ம நபர்கள் நாகபத்திரனை வெட்டிக் கொலை செய்திருக்கலாம் என காவல்துறையினர் சந்தேகிக்கின்றனர். இதனையடுத்து காவல்துறையினர் நாகபத்திரனின் உடலை கைப்பற்றி தூத்துக்குடி அரசு மருத்துவமனைக்கு பிரேத பரிசோதனைக்காக அனுப்பி வைத்துள்ளனர். இச்சம்பவம் குறித்து நாகபத்திரனின் மகனான முத்துக்குமார் என்பவர் சாயர்புரம் காவல் நிலையத்தில் புகார் அளித்துள்ளார். அந்த புகாரின் பேரில் வழக்கு பதிவு செய்த காவல்துறையினர் தீவிர விசாரணை மேற்கொண்டு வருகின்றனர்.