முதியவரிடம் இருந்து 2 லட்ச ரூபாயை திருடிச் சென்ற மர்ம நபர்களை காவல்துறையினர் வலைவீசி தேடி வருகின்றனர்.
ராணிப்பேட்டை மாவட்டத்தில் உள்ள கட்டளை கிராமம் ஆதிகேசவபெருமாள் கோவில் தெருவில் வீரசிம்மன் என்பவர் வசித்து வருகிறார். இவர் ஒரு விவசாயி. இந்நிலையில் வங்கியில் தனது சேமிப்பு கணக்கில் இருந்த 2 லட்ச ரூபாயை எடுத்துக்கொண்டு தனது கிராமத்திற்கு சைக்கிளில் வந்துள்ளார். அப்போது அம்மன் கோவில் அருகாமையில் சென்ற நிலையில் அவரைப் பின் தொடர்ந்து மோட்டார் சைக்கிளில் வந்த அடையாளம் தெரியாத மர்ம நபர்கள் 2 பேர் பத்து ரூபாய் நோட்டை கீழே போட்டுவிட்டு முதியவரிடம் உங்கள் பணம் கீழே கிடப்பதாக கூறியுள்ளனர்.
இதனை நம்பிய முதியவர் கீழே குனிந்து பத்து ரூபாய் நோட்டை எடுத்த போது திடீரென மர்ம நபர்கள் முதியவர் சைக்கிளில் வைத்திருந்த 2 லட்ச ரூபாயை பறித்து சென்றுள்ளனர். இதனால் அதிர்ச்சி அடைந்த முதியவர் திருடன் என கூச்சலிட்டுள்ளார். இதனை அடுத்து வழிப்பறி கொள்ளையர்கள் மோட்டார் சைக்கிளில் தப்பி சென்றுள்ளனர். இது குறித்து முதியவர் காவல்நிலையத்தில் புகார் கொடுத்துள்ளார். அந்தப் புகாரின் பேரில் வழக்குப்பதிவு செய்த காவல்துறையினர் 2 லட்ச ரூபாயை வழிப்பறி செய்த மர்ம நபர்களை வலைவீசி தேடி வருகின்றனர்.