‘என் மெசேஜ் காணவில்லை’ – பயனர்களைப் புலம்பவைக்க வரும் வாட்ஸ்அப் அப்டேட்!

வாட்ஸ்அப் நிறுவனம் பயனர்களின் நீண்ட நாள் கோரிக்கைகளைப் புதிய அப்டேட்டில் சரி செய்துள்ளது. கடந்த வருடம் வாட்ஸ்அப்பின் சோதனை வடிவத்தில் இந்த அம்சம் பரிசோதிக்கப்பட்டது. ஆண்ட்ராய்டு மொபைல்களில் இந்த வசதியை அறிமுகம் செய்யத் திட்டமிருந்தது. தற்போது ஆண்ட்ராய்டு, ஆப்பிள் ஐஓஎஸ் என அனைத்து இயங்கு தளங்களிலும் வாட்ஸ்அப் செயலியில் இந்த வசதி அறிமுகம் செய்யப்படும் என அதிகாரப்பூர்வ தகவல் வெளியாகியுள்ளது.

நாம் மற்றவர்களுக்கு அனுப்பும் மெசேஜ்கள் ஏழு நாள்களுக்குப் பின்னர் தானாகவே டெலீட் செய்யப்படும் வசதியை வாட்ஸ்அப் அறிமுகம் செய்யவுள்ளது. இதனைப் பயன்படுத்த செட்டிங்ஸ்சில் கூடுதலாக ஒரு வசதி இணைக்கப்படுகிறது.

வாட்ஸ்அப் பயன்படுத்துவோர் வேண்டுமென்றால் செட்டிங்ஸ் சென்று இந்த வசதியை ஆன் செய்துகொள்ளலாம். வேண்டாம் என்றால் பயன்படுத்தத் தேவை இல்லை. இதற்கு வாட்ஸ்அப்பில் Settings > Storage and Data > Manage Storage சென்று இந்த வசதியைப் பெற வேண்டும்.

இது தெடர்பான காணொலி ஒன்றை வாட்ஸ்அப் நிறுவனத்தால் பகிரப்பட்டுள்ளது. தனி நபருடனான சாட் செட்டிங்ஸ் உரிமம் அவரிடம்தான் இருக்கும் ஆனால், குரூப்பில் இத்தகைய செட்டிங்ஸை தீர்மானிக்கும் உரிமம் குரூப் அட்மினிடம்தான் இருக்கும் எனத் தெரிவித்துள்ளனர். இந்தப் புதிய அப்டேட் உலகளவில் இந்த வாரம் உபயோகத்திற்கு வரும் எனத் தெரிகிறது.