திருநெல்வேலி மாவட்டத்தில் அம்மன் கோவிலுக்கு நுழைந்த மர்ம நபர்கள் அம்மன் சிலையை உடைத்து சென்ற சம்பவம் பெரும் பரபரப்பை ஏற்படுத்தியுள்ளது.
திருநெல்வேலி மாவட்டம் உவரி அடுத்துள்ள குட்டத்தில் மிகவும் பழமைவாய்ந்த ஆனந்தவல்லி அம்மன் கோவில் உள்ளது. இந்நிலையில் நேற்று அதிகாலையில் பூசாரி கோவிலை திறந்து வைத்துவிட்டு அருகில் உள்ள அவரது வீட்டிற்கு சென்றுள்ளார். இதனையடுத்து சிறிது நேரத்திற்கு பிறகு மீண்டும் கோவிலுக்கு வந்து பார்த்தபோது அம்மனின் கண்மலர் கீழே கிடந்துள்ளது. மேலும் அம்மன் சிலையில் பல இடங்களில் உடைக்கப்பட்டு இருந்துள்ளது.
இதனை பார்த்து பதறிய கோவில் பூசாரி உடனடியாக கோவில் நிர்வாக அதிகாரிகளிடம் தெரிவித்துள்ளார். மேலும் அவர்கள்உவரி காவல் நிலையத்தில் புகார் அளித்துள்ளனர். இது குறித்து போலீஸ் இன்ஸ்பெக்டர் செல்வி தலைமையில் காவல்துறையினர் கோவிலுக்கு சென்று விசாரணை நடத்தியுள்ளனர். இதனைத்தொடர்ந்து கைரேகை நிபுணர்களை வரவழைத்து கோவில் சிலையை உடைத்து சென்ற மர்ம நபர்கள் குறித்து தடயங்களை சேகரித்துள்ளனர். மேலும் அம்மன் சிலையை உடைத்த திருடர்கள் குறித்து விசாரணை மேற்கொண்டுள்ளனர்.