நடிகை பூஜா ஹெக்டேவுக்கு “வீரம்” ரீமேக் படப்பிடிப்பு தளத்தில் ஏற்பட்ட விபத்தில் காயம் அடைந்துள்ளார்.
இயக்குனர் மிஷ்கினின் இயக்கத்தில் ஜீவா கதாநாயகனாக நடித்த முகமூடி திரைப்படத்தின் மூலம் கதாநாயகியாக அறிமுகமானவர்தான் பூஜா ஹெக்டே. இந்தத் திரைப்படத்தின் தோல்வியினால் அவருக்கு பெரிதாக வாய்ப்புகள் கிடைக்கவில்லை. பின்னர் தெலுங்கு ஹிந்தி படங்களில் நடித்து வந்த பூஜா ஹெட்டேவுக்கு தெலுங்கில் வெற்றி பெற்ற அல வைக்குந்தபுரமுலோ திருப்புமுனையாக அமைந்தது. இந்தத் திரைப்படத்தில் இடம்பெற்ற புட்ட பொம்மை போன்ற பாடல்கள் தேசிய அளவில் கவனம் பெற்றுள்ளன.
இதன் காரணமாக தெலுங்கு தமிழ் மற்றும் ஹிந்தி போன்ற மொழிகளில் பிரபல ஹீரோக்களுக்கு ஜோடியாக நடித்துள்ளார். அந்த வகையில் தமிழில் நெல்சன் இயக்கத்தில் விஜய்க்கு ஜோடியாக “பீஸ்ட்” திரைப்படத்தில் பூஜா ஹெக்டே நடித்திருந்தார். தற்போது நடிகர் அஜித்தின் “வீரம்” திரைப்படம் ஹிந்தி ரீமேக்கான “கிசி கா பாய் கிசி கி ஜான்” திரைப்படத்தில் சல்மான் கானுக்கு ஜோடியாக பூஜா ஹெக்டே நடித்து வருகின்றார். இந்தத் திரைப்படத்தின் படபிடிப்பின் போது பூஜா ஹெக்டேவுக்கு காயம் ஏற்பட்டுள்ளது. இதனை தனது இன்ஸ்டாகிராம் பக்கத்தில் பகிர்ந்துள்ளார். அவர் விரைவில் குணமாக ரசிகர்கள் வாழ்த்து தெரிவித்து வருகின்றனர்.
