சென்னை விமான நிலையத்திலிருந்து துப்பாக்கி முனையில் கடத்தப்பட்ட கடற்படை அதிகாரி மகாராஷ்டிராவில் படுகொலை செய்யப்பட்ட சம்பவம் அதிர்ச்சியை ஏற்படுத்தியுள்ளது.
ஜார்கண்ட் மாநிலத்தை சார்ந்தவர் சூரஜ்குமார் மிதிலேஷ் துபே. இவர் தமிழகத்தில் உள்ள கோவை மாவட்டத்தில் இருக்கும் கடற்படை பயிற்சி நிறுவனத்தில் கடற்படை அதிகாரியாக பணியாற்றி வந்தார். இவர் கடந்த 31ஆம் தேதி ஜார்கண்டில் இருந்து சென்னை விமான நிலையத்திற்கு வந்துள்ளார். அதன்பின் அவர் அங்கிருந்து மூன்று நபர்களால் துப்பாக்கி முனையில் கடத்திச் செல்லப்பட்டுள்ளார். மேலும் அவரிடம் ரூபாய் 10 லட்சம் கேட்டு மிரட்டியதாகவும் கூறப்படுகிறது.
இது தொடர்பாக சென்னை காவல்துறையினர் வழக்குப்பதிவு செய்து கடற்படை அதிகாரியை கடத்தி சென்றவர்களை தீவிரமாக தேடி வந்துள்ளனர். இந்நிலையில் மகாராஷ்டிரா மாநிலத்தில் உள்ள பால்கர் மாவட்ட காட்டுப்பகுதியில் சூரஜ்குமாரின் கை கால்களை கட்டிய நிலையில் தீ வைத்து எரித்துள்ளனர். இதனால் அலறித் துடித்த சூரஜ்குமாரின் சத்தத்தை கேட்டு அக்கம் பக்கத்தில் இருந்தவர்கள் விரைந்து வந்து அவரை மருத்துவமனைக்கு கொண்டு சென்றுள்ளனர்.
ஆனால் 90 சதவீதத்திற்கும் அதிகமான தீக்காயங்கள் அவரது உடம்பில் இருந்ததால் அவர் அங்கிருந்து மேல் சிகிச்சைக்காக மும்பை கடற்படை மருத்துவமனைக்கு அனுப்பி வைக்கப்பட்டுள்ளார். ஆனால் அவர் செல்லும் வழியிலேயே பரிதாபமாக உயிர் இழந்துள்ளார். இதுகுறித்து காவல்துறையினர் வழக்குபதிவு செய்து கடற்படை அதிகாரியை கொலை செய்த குற்றவாளிகளை தீவிரமாக தேடி வருகின்றனர்.