பையில் மதுபாட்டில்களை கடத்தி சென்ற வாலிபரை காவல்துறையினர் கைது செய்ததோடு மது பாட்டில்களை பறிமுதல் செய்துள்ளனர்.
தென்காசி மாவட்டத்திலுள்ள சிவகிரி பகுதியில் தடையை மீறி மதுபாட்டில்கள் கடத்தி செல்வதாக காவல் துறையினருக்கு ரகசிய தகவல் கிடைத்துள்ளது. அந்த தகவலின் படி காவல்துறையினர் அப்பகுதியில் வாகன தணிக்கையில் ஈடுபட்டிருந்தனர். அப்போது அவ்வழியாக நடந்து சென்ற வாலிபர் காவல்துறையினரை பார்த்ததும் சற்று தூரத்திலேயே கையில் ஒரு பையுடன் நீண்ட நேரமாக நின்று கொண்டு அங்கேயும், இங்கேயும் பார்த்துக்கொண்டிருந்தார். இதனை பார்த்த காவல்துறையினர் அவரை அழைத்து சோதனை செய்தபோது அந்தப் பையில் 50 மதுபாட்டில்கள் இருப்பதை கண்டுபிடித்துள்ளனர்.
இதனையடுத்து காவல்துறையினர் அவரிடம் நடத்திய விசாரணையில் அவர் அதே பகுதியில் வசிக்கும் கிருஷ்ணமூர்த்தி என்பதும் அவர் மதுபாட்டில்களை கடத்தி சென்று விற்பனை செய்வதும் தெரியவந்துள்ளது. அதன் பிறகு காவல் துறையினர் கிருஷ்ணமூர்த்தி விற்பனைக்காக வைத்திருந்த 50 மது பாட்டில்களை பறிமுதல் செய்துள்ளனர். மேலும் இச்சம்பவம் குறித்து வழக்குப்பதிந்த காவல்துறையினர் அனுமதி இல்லாமல் மதுபாட்டில் கடத்திய குற்றத்திற்காக கிருஷ்ணமூர்த்தியை கைது செய்து தீவிர விசாரணை மேற்கொண்டு வருகின்றனர்.