கார் மோதிய விபத்தில் முதியவர் உயிரிழந்ததோடு இருவர் படுகாயம் அடைந்த சம்பவம் சோகத்தை ஏற்படுத்தியுள்ளது.
தென்காசி மாவட்டத்திலுள்ள குறிப்பன்குளம் பகுதியில் அருண் என்பவர் தனது குடும்பத்துடன் வசித்து வருகின்றார். இவர் சென்னையில் ஒரு நிறுவனத்தில் ஊழியராக பணிபுரிந்து வருகின்றார். கடந்த சில நாட்களுக்கு முன்பு தான் அருண் தனது சொந்த ஊரான குறிப்பன் குளம் பகுதிக்கு சென்றுள்ளார். இந்நிலையில் அருண் நெட்டூருக்கு செல்வதற்காக தனது காரில் குறியப்பன்குளம் பகுதியில் சென்றுள்ளார். அப்போது அவ்வழியில் அதே பகுதியில் வசிக்கும் அருணாச்சலம் என்பவர் தனது வீட்டின் முன்பு நின்று கொண்டு இருவருடன் பேசிக்கொண்டிருந்தார். இதனையடுத்து அருண் ஓட்டிச் சென்ற காரானது திடீரென கட்டுப்பாட்டை இழந்து வேகமாக சென்று அந்தப் பகுதியில் நின்று பேசிக் கொண்டிருந்தவர்களின் மீது மோதிவிட்டு அங்குள்ள வீட்டு சுவர் பகுதியில் மோதி கார் நின்றது.
இந்த விபத்தில் பலத்த காயமடைந்த அருணாச்சலம் சம்பவ இடத்திலேயே பரிதாபமாக உயிரிழந்து விட்டார். இதில் மற்ற 2 பேரும் பலத்த காயம் அடைந்து உயிருக்காக போராடிக்கொண்டு இருந்தனர். இதுகுறித்து தகவலறிந்த காவல்துறையினர் சம்பவ இடத்திற்கு விரைந்து சென்று படுகாயமடைந்த இரண்டு பேரையும் உடனடியாக மீட்டு சிகிச்சைக்காக அரசு மருத்துவமனைக்கு அனுப்பி வைத்துள்ளனர். அங்கு அவர்களுக்கு தீவிர சிகிச்சை அளித்து வருகின்றனர். இதனையடுத்து காவல்துறையினர் உயிரிழந்த அருணாச்சலத்தின் உடலை கைப்பற்றி உடற்கூறு ஆய்வுக்காக அரசு மருத்துவமனைக்கு அனுப்பி வைத்துள்ளனர். மேலும் இச்சம்பவம் குறித்து வழக்குப்பதிவு செய்த காவல்துறையினர் விபத்து ஏற்படுத்திய குற்றத்திற்காக அருணை கைது செய்து தீவிர விசாரணை மேற்கொண்டு வருகின்றனர்.