அடுத்த சோதனைக்கு தயாரான வடகொரியா…. எச்சரிக்கை விடுத்துள்ள தென்கொரியா…!!!

தென் கொரிய அரசு, அணு ஆயுத சோதனைக்கு வடகொரியா தயாராகிக் கொண்டிருப்பதாக எச்சரிக்கை விடுத்திருக்கிறது.

வட கொரிய நாட்டின் தலைவர் கிம் ஜாங் உன், கடந்த 2011-ம் வருடத்தில் பதவியேற்றதிலிருந்து தொடர்ந்து சக்தி வாய்ந்த மிகப்பெரிய ஏவுகணைகளையும் ஆயுதங்களையும் சோதனை செய்து வருகிறார். ஐ.நா பாதுகாப்பு கவுன்சில் கொண்டு வந்த தீர்மானங்களை மீறிவருகிறார். எனவே, அமெரிக்கா போன்ற நாடுகள் வட கொரிய நாட்டின் மீது கடும் பொருளாதார தடைகளை அறிவித்தன.

எனினும், ஐந்து வருடங்களுக்கு பின் முதல் தடவையாக கடந்த 24 ஆம் தேதி அன்று தொலை தூரத்திற்கு செல்லக்கூடிய மிகப்பெரிய சக்தி வாய்ந்த ஏவுகணையை வடகொரியா சோதனை செய்தது. அமெரிக்க நாடு வரை சென்று தாக்கக்கூடிய அந்த ஏவுகணை சோதனை வெற்றிகரமாக நடந்து முடிந்ததாக வடகொரியா தெரிவித்தது.

இந்நிலையில் தற்போது வடகொரியா அடுத்த நிலையாக அணு ஆயுத சோதனைக்கு தயாராகி கொண்டிருப்பதாக தென்கொரிய அரசு எச்சரிக்கை விடுத்துள்ளது.

வடகொரியாவின் வடக்கு ஹம்கியோங் மாகாணத்தின் புங்கியே-ரி அணு ஆயுத சோதனை தளத்தில் கட்டுமான பணிகள் நடப்பதாக தென்கொரியா தகவல் வெளியிட்டுள்ளது. 4 சுரங்கபாதைகளுடைய அந்த சோதனை களமானது, கடந்த 2018-ம் வருடத்தில் முன்னாள் அதிபர் டிரம்ப் உடன் நடைபெற்ற பேச்சுவார்த்தைக்கு பிறகு அடைக்கப்பட்டது. அதனைத்தொடர்ந்து சோதனைத்தளத்தை இடிக்கும் பணிகள் நடந்தது.

இந்நிலையில், இடிக்கப்பட்ட பகுதிகள் மீண்டும் கட்டபட்டு வருவதாக கூறப்பட்டிருக்கிறது. இன்னும் ஒரு மாதத்தில் பணிகள் முடிந்து, வடகொரியா அணு ஆயுத சோதனையை மேற்கொள்ளும் என்றும் தென்கொரியா தெரிவித்திருக்கிறது.

அவ்வாறு, வடகொரியா இந்த அணு ஆயுத சோதனையை மேற்கொண்டால், அது வடகொரியாவின் 7-வது அணு ஆயுத சோதனையாகும். மேலும், 4½ வருடங்களுக்கு பின் மேற்கொள்ளப்படும் முதல் சோதனையாக இருக்கும்.

Categories