ராமநாதபுரம் மாவட்டத்தில் இருசக்கரவாகனத்தில் சென்று கொண்டிருந்தவரை வழிமறித்து தாக்கிய 2பேரை போலீசார் தேடி வருகின்றனர்.
ராமநாதபுரம் மாவட்டத்தில் உள்ள வள்ளல் பரி பகுதியில் விஜய மாடசாமி(32) என்பவர் வசித்து வந்துள்ளார். இவர் கைவினைத் தொழில் செய்து வந்துள்ளார். இந்நிலையில் வழக்கம் போல நேற்று முன்தினம் வேலைக்கு சென்று விட்டு இருசக்கர வாகனம் மூலம் வீடு திரும்பியுள்ளார். இதனையடுத்து வசந்தநகர் பகுதியில் வழியாக சென்றுகொண்டிருந்த போது இருவர் மாடசாமியை வழிமறித்துள்ளனர். இதனைத்தொடர்ந்து அவர் வைத்திருந்த 30,000 ரூபாயை பறித்ததோடு மட்டுமல்லாமல் மாடசாமியையும் தாக்கியுள்ளனர்.
இதில் படுகாயமடைந்த மாடசாமியை அங்கிருந்தவர்கள் உடனடியாக மீட்டு ராமநாதபுரம் அரசு மருத்துவமனையில் அனுமதித்துள்ளனர். இச்சம்பவம் தகவலறிந்து வந்த காவல்துறையினர் நடத்திய விசாரணையில் மாடசாமியை தாக்கியது வசந்த நகரை சேர்ந்த காமாட்சி மற்றும் வின்சென்ட் என்பது தெரியவந்துள்ளது. இதனையடுத்து தலைமறைவான அந்த 2 பேரை காவல்துறையினர் தேடி வருகின்றனர்.